El Premiu Timón de l'Arribada 2009 va pa Manuel García "Galano"

El Premiu Timón, otorgáu poles xornaes lliteraries de l'Arribada que van celebrar una edición más esti setiembre en Xixón, fue a parar al veteranu escritor Manuel García "Galano", según decidió por unanimidá un xuráu que rescampló el "valir de la so trayectoria lliteraria y la so aportación a la cultura del occidente asturianu".
 
El xuráu tuvo integráu por Alberto Álvarez Peña, Adolfo Camilo Díaz, Luis Casteleiro, Roberto Colunga, Antón García, Aurora García Rivas, Humberto Gonzali, Xosé Nel Riesgo, David M. Rivas y Xuan Xosé Sánchez Vicente. Estos consideren qu'esti autor, nacíu n'A Roda (Tapia) nel 1922, ye destacable "amás de polos sos importantes méritos lliterarios, por escribir na so fala cuando cuasimente naide nun lo facía; facer que la so xente participare naquél entós nuna cultura propio, implicándola nel teatru qu'escribió y que representaben los vecinos como aficionaos; ser un referente cultural, pero tamién un referente de bon facer y un entusiasta de la cultura d'esta fastera d'Asturies, como asina lo reconocieren l'Academia de la Llingua, el Principáu y el conceyu de Tapia; tener trabayao estremaos xéneros amás del teatru, como ye'l casu la poesía y la narrativa, amás de facer trabayos d'investigación como ye un vocabulariu, artículos de prensa, estudios sobre música, ente más otros; ser la persona más vieya del occidente que sigue escribiendo y que tien detrás una mui consideratible creación".

La entrega del III Premiu Timón, consistente nuna pintura-cerámica del escultor xixonés Jesús Castañón, fadráse'l prósimu 26 de setiembre, sábadu, a les 20:00 hores, nel Salón d'Actos del Centru de Cultura Antiguu Institutu de Xixón.