Los partíos d'ámbitu asturianu celebren el 8 de setiembre por separao n'Illas, Xixón, Uviéu y Villaviciosa
|
5 Setiembre, 2009 por E.P. / Redacción
- Inicie sesión o rexístrese pa espublizar comentarios
Les organizaciones y partíos políticos d'ámbitu asturianu celebren una vez más por separao l'ocho de setiembre en cuatro actos diferentes que van tener llugar en cuatro poblaciones asturianes: Illas,Uviéu, Xixón y Villaviciosa.
Bloque por Asturies súmase a los actos entamaos por Izquierda Xunida nel polideportivu de La Caizuela, nel conceyu d'Illas, a partir de les 13:00 hores, baxo'l lema "Ante la crisis, más Asturies". A esta convocatoria tamién van asistir Los Verdes y Lliberación.
Unidá Nacionalista Asturiana va celebrar el so actu nesti casu en L'Atalaya de Xixón. De magar les 13.00 dará entamu una espicha, siguida de música, xuegos tradicionales y intervenciones polítiques. L'actu va valir pa presentar tamién el primer númberu del periódicu de la organización, UNA Voz.
Andecha Astur celebrará el so yá tradicional "manifestamientu" peles cais d'Uviéu, tamién de magar les 13.00 hores, dende la Estación de Renfe d'Uviéu, y convocáu baxo la conseña 'Sos Asturies'.
Pela so parte, Unión Asturianista, coalición formada pol Partíu Asturianista (PAS) y Unión Renovadora Asturianas (URAS) celebrará la fecha na Plaza Caveda y Nava de Villaviciosa, como homenaxe al "prócer" maliayés que-y da nome. Habrá discursos políticos de Xavier López Uría y Xuan Xosé Sánchez Vicente, p'acabar con una comidá de "xermandía" nel restaurante Amandi. Entamará a la mesma hora que'l restu de convocatories, la una la tarde.
Efrén d'Andrés
Lo + visto de la selmana
Comentarios
Cola representación institucional tan granible que tienen toos yá puen tar bien arguyosos y cellebralo per tolo alto................
Creo que los del Circu del Sol avisen que yá nun va venir más a Asturies, nin tampoco'l Circu de Miliki, que vieron esto y que non lo superen, que nunca se vió mayor payasada
Gabis
Dígotelo yo!!
Bono, falando serio, esto yá pasa muncho de la raya. L'espectáculu esperpénticu y bochornosu que van dar toes estes tribus urbanes polítiques (más qu'organizaciones) ye un insultu pa tola xente que daveres s'esmolez poles coses d'esti país asturianu. El dañu que-y tán faciendo al asturianismu/nacionalismu tanto políticu como cultural ye descomanáu. Desprestixándolos socialmente. Poniénolos n'evidencia y faciendo d'ellos oxetu d'escarniu y risión públicos. Y yá valió. ¿Acuéi?. ¡¡Yá valió!!. De mano, hai que-yos dicir alto y claro que nin suañen col nuestru votu enxamás mientres sigan con esta comedia d'engarradies y dixebres que nun val nin pa representar nel antroxu de mala que ye. Como asturianu pienso que'l Día de la Nación Asturiana ye una fecha que merez respetu. Y toos estos mierdanes tán faciendo xirigoncia d'ella descaradamente. Nun tienen consideración pa nada nin pa naide. Nin consideración, nin respetu, nin vergüenza.
Eso ye lo que yo ciritico, depués vienen a vacilanos escribiendo guapos artículos falando de:"unidá, xuntura, camín d'alderique" y a la hora la verdá caún pel so llau, caún cola so fiestina familiar y caún cola so candidatura ridícula y de resultaos ridículos, a les elecciones. Si l'asturianismu políticu nun cuaya, nin munchu menos el nacionalismu, polo menos que nun faigan el ridículu n'actos marxinales y frikis, si nun saben trabayar y facer algo presentable a la sociedá asturiana que se vayan pa la so casa, que toi fartu poneme colloráu de vergoña ayena que me da ver la mesma cantinela un añu sí y otru tamién, que se vayan, yá fracasaron quesió cuantes veces, que se vayan, porque nun valen.
Gabis