El PP d'Asturies alvirtió al Gobiernu que la subida d'impuestos pue ser la "del camín más fácil a la salida de la crisis, pero la de peores consecuencies" pa los ciudadanos. El cabezaleru del PP asturianu, Ovidio Sánchez, aseguró que subir los impuestos nun significa qu'aumente la recaudación y añadió qu'esa propuesta respuende a la falta d'idees y soluciones.

   Poro, los populares asturianos proponen una serie de midíes y idees que permitan sacar alantre un nuevu modelu económicu. Ente eses midíes, que'l PP ta dispuestu a esplicar de manera "clara y concreta", destaquen la reducción de los altos cargos, la redimensión del sector públicu empresarial y fundacional y los planes d'eficiencia na xestión sanitaria.

   Asina, la diputada del PP, Alejandra Cuétara, esplicó en rueda prensa que redimensionando'l sector públicu empresarial, los "denominaos chiringuitos socialistes" podíen aforrar 200 millones d'euros. Y ye que la 'popular' indicó qu'hai sociedaes públiques que faen trabayu por duplicáu o qu'únicamente suponen burocracia innecesaria.

   "El Gobiernu nun ta dispuestu a sacrificase, en cambiu quier que lo faigan los contribuyentes", dixo Cuétara, qu'añadió que l'Executivu d'Areces "tien que dexar de vivir na so Corte como si nun pasare nada treslladno a los asturianos los gastos de la so mala xestión".

   A xuiciu del PP ye una "irresponsabilidá" penalizar a los contribuyentes con una subida d'impuestos, dao que la única fórmula pa salir de la crisis ye'l "aforru y la bona xestión", dalgo qu'al so xuiciu nun se da nel Executivu asturianu.

   El PP alvirtió de les consecuencies que pue carretar la deuda a la que recurre'l Gobiernu y recordó qu'esa deuda "yá sobrepasó de sobra les llendes" y van ser los ciudadanos los que van tener que facer frente a la mesma. "Los señores del PSOE y d'IU van dexar los sos cargos, pero nun son ellos los que van facer frente a la deuda, van facelo los asturianos colos sos tributos", dixo Cuétara.

   Nesti sen, indicó que l'Executivu d'Areces "prefier ver cómo los autónomos echen la persiana a los sos negocios a dici-yos a los sos colegues de partíu que nun van poder siguir cobrando les cantidaes que cobren".