Les Xornaes del Cómic d'Avilés entamen con dos esposiciones d'autores españoles en L'Atrio y la Casa la Cultura

Les XIV Xornaes del Cómic Villa d'Avilés entamen coles esposiciones de los illustradores españoles Miguel Ángel Martín y Rubén Pellejero. Estes dos esposiciones, d'un total de cinco, suponen l'entamu d'unes sesiones que se van prollongar la próxima selmana.

   El lleonés Miguel Ángel Martín, muestra nel centru comercial L'Atrio una pequeña muestra del trabayu realizáu nos últimos años, nel que destaca la fuerza que'l color aporta a les sos obres. El llabor de Rubén Pellejero tamién va poder observase, de magar esta tarde, na sala de la Casa la Cultura d'Avilés.

   Dende'l llunes y hasta'l sábadu ta previsto que dellos autores, tanto nacionales como internacionales, pasen per Avilés pa interaicionar col públicu. Precisamente ehí reside l'encantu d'esti certame, según el so director. Jorge Iván Argiz, en declaraciones a Europa Press, aseguró lo importante que resulta que públicu y autores s'alcuentren porque "el lleer ye un llabor que los aficionaos realizamos en solitariu y los autores tamién cuando crean".

   Dalgunos de los dibuxantes que nos próximos díes van dase cita n'Avilés son Herb Trimpe, ún de los autores de Lobezno; Scott Hampton, que delles veeces dio vida a Batman nun cómic, o Mark Buckingham, ún de los fixos tolos años na villa y de los creadores contemporáneos que más premios acumulen nes sos estanteríes.

   La muyer va teniendo cada vez un papel más importantes nel mundu de la historieta y prueba d'ello ye qu'esti añu, el primer día, va tar dedicáu al xéneru femenín. Les españoles Sandra Pérez y Cristina Durán, ente otres, van ofrecer la so visión.