El Sporting entamó la Lliga perdiendo contra'l Barça

Nun pudo ser. L'entamu de la Lliga pal Sporting acabó en derrota. Sicasí, cuando enfrente tienes probablemente al meyor equipu de les últimes décades del futbol européu, el F.C. Barcelona, lo normal ye perder. De toes formes los asturianos, pese a los 3 goles a 0, dexaron sensaciones positives en conxuntu, anque habría que correxir urxentemente los despistes nos marcaxes a balón paráu, error qu'al Sporting costó-y los trés puntos.

El Barcelona del triplete venció al Sporting nun partíu que los catalanes resolvieron a balón paráu ante un Sporting qu'intentó xuga-y al rival y qu'apuntó maneres a ratos, pero foi incapaz de retener el balón, marcando los barcelonistes el ritmu del partíu con un xuegu correctu y les idees clares con unos futbolistes que paez que xueguen de memoria. Durante tola primera parte'l dominu local foi claru, llegando bien al área asturiana anque ensin concretar, faltando-y l'últimu remate. El Sporting mientres a aguantar los arreones, con bastante orden na defensa enforma nos centrales, por cuenta de los nuevos fichaxes Gregory y Botía. Sicasí, un despiste nel marcaxe permitió a Bojan rematar a placer un centru peináu por Keita. Primer error y primer gol. Los asturianos mientres intentaben abrir campu y buscar un pase ente les llinies blaugranes que diere alguna ocasión, como la de Diego Castro que nun remate forzáu nel área acabó mandando'l balón a la grada. Pero'l Barça siguía a lo suyo. Otru centru, otru despiste nel marcaxe y otru remate de Keita punxo a poco del final d'esta parte'l segundu nel marcador.

Na segunda parte'l Sporting salió con ganes de meter algun sustu a los barcelonistes. De toes formes fueron más les ganes qu'otra cosa, proque sacante dalgun tramu de xuegu, la posesión del balón continuó nes botes catalanes. Entró un segundu punta, Bilic, y llegó dalguna ocasión más, como'l par de disparos de Bilic y Barral y un remate de cabeza de Gregory que salió fuera por poco. Sacante eso, siguió'l monólugu local hasta que la nueva incorporación, Ibrahimovic, metió'l tercer y definitivu gol pal Barcelona.
 
L'actuación de los fichaxes foi buena

A pesar de too queden sensaciones positives, enforma n'algunos de los fichaxes. Los centrales Botía y Gregory paecen da-y más seguridá y más orden a la defensa mientres que'l porteru Juan Pablo tuvo correctu. Asimesmo, lo mesmo Rivera que De las Cuevas punxeron-y ganes, pero la falta de posesión del balón y el rival qu'había enfrente nun propiciaron que dambos xugadores pudieren espeyar el so xuegu. Nun yera'l día pa ello.

Agora queden menos de dos selmanes pa que'l Sporting emprincipie realmente la so Lliga frente al Almería n'El Molinón. Esi domingu veremos por primer vez si esti equipu va mantener un añu más al nuesu país en Primera División. Qu'asina seya.

F. C. Barcelona 3- Sporting de Xixón 0

Ficha Técnica

F.C. Barcelona: Valdés; Alves, Piqué (Fontás, min.84), Puyol, Maxwell (Abidal, min.57), Sergio Busquets, Xavi, Keita, Pedro, Ibrahimovic y Bojan (Jeffren, min.80).

Sporting de Xixón: Juan Pablo, Sastre, Gregory, Botía, Canella, Michel, Diego Camacho (Bilic, min.57), De las Cuevas (Maldonado, min.71), Rivera, Diego Castro (José Angel, min.77) y Barral.

Goles: 1-0: Bojan, min.18. 2-0: Keita, min.42. 3-0: Ibrahimovic, min.82.

Árbitru: Ramírez Domínguez (andaluz). Sacó tarxetes amarielles a Barral (min.27) y Rivera (min.70).