Unidá Nacionalista Asturiana espresó la so preocupación pol fechu de que los plazos pa concretar les cantidaes del nuevu modelu de financiación tean "allargándose ensin motivu dalu" y l'anuncia de qu'Asturies tien de reintegra-y al estáu 190 millones d'euros. Faustino Zapico, voceru d'UNA, criticó que "una vez afitaos los criterios de repartu, nun hai pega pa retrasar nin un día más la información sobre qué cantidaes correspuenden a les Comunidaes Autónomes".
 
Asimesmo la organización nacionalista considera que la incertidumbre que vien xenerando la ministra d'economía al dar anuncia del reintegru de 190 millones ye mui negativa pa encarar les necesidaes d'Asturies como la financiación sanitaria.

Los nacionalistes llamenten la intervención de la Ministra d'Economía Elena Salgado, que según Faustino Zapico "na llinia de los ministros del gobiernu de Zapatero namás valió pa xenerar más confusión yá que nun aclara les cantidaes de nuevu modelu de financiación autonómicu y al tiempu reclama-yos unes cantidaes a les Comunidaes Autónomes que difícilmente van poder devolve-y al Estáu central".

Zapico indicó asina mesmo que "ye normal que n'Asturies teamos esmolecíos coles declaraciones de la Ministra d'Economía porque plantega qu'Asturies va tener que devolve-y fondos al Estáu cuando los gobernantes asturianos yá nos tienen avisaos de que los fondos autonómicos tán escosaos y que nun van poder encarar nin los gastos sanitarios" y d'otra miente "niéguense a dar les cifres que nos correspuenden nel modelu de financiación autonómica, torgando la posibilidá de facer previsiones series pal prósimu exerciciu económicu".

Finalmente dende UNA conviden al gobiernu asturianu a que presione al gobiernu de Zapatero pa que concrete cómo-y afecta a Asturies el cambiu nel modelu de financiación, yá que si nun ye asina "la incertidume que xenera'l gobiernu de PSOE ya IU cola política de despilfarru que tien hipotecaos los servicios públicos, va amestase a la incertidume de nun saber con qué recursos vamos cuntar nel siguiente exerciciu económicu pola ineptitú ya irresponsabilidá de Zapatero" cuando según Faustino Zapico "tendríemos que tar falando de cómo vamos invertir los recursos públicos pa salir de la crisis y parar los sos efectos" cosa imposible "hasta que'l gobiernu del estáu faiga los deberes nesta materia" terminó diciendo.