Los Verdes camienten que tanto'l Ministeriu como la Fiscalía tienen d'investigar el sobrecoste d'El Musel

El voceru Los Verdes d'Asturies, Juan Ignacio González, dixo que ye necesario que'l Ministeriu Fomentu faiga una investigación interna sobre'l sobrecoste del enanchamientu del Puertu d'El Musel, en Xixón, d'unos 250 millones. Esi procesu, acordies con Los Verdes tien que dir acompañáu d'una investigación per parte la Fiscalía, ante lo que camienten que que ye "un machacamientu enforma a les arques públiques en beneficiu d'intereses privaos".

   Ignacio González, al traviés d'una nota prensa, sopelexó "imprescindibles" los ceses del presidente de l'Autoridá Portuaria de Xixón, Fernando Menéndez Rexach y del direutor de l'Autoridá Portuaria, José Luis Díaz Rato. "O favorecieron intereses falsos y engañosos, o'l so nivel de competencia ye nulu pal desempeñu públicu que faen, nun organismu con autonomía y que se camudó nun ámbitu impunidá ya irresponsabilidá. Ye necesario que colen pa que nun torguen la llabor d'investigación", señaló.

   Per otru llau, Los Verdes recordaron que la policía investigó los robos de materiales d'obres, que cuntaben cola "autoría y complicidá" de persones emplegaes na propia obra. Dixeron qu'en concreto foi deteníu un ex alcalde del Partíu Popular, polo que Los Verdes d'Asturies nun refuguen la esistencia de "tratos" y "responsabilidaes" nel PP.

   Juan Ignacio González recordó que'l grupu parlamentariu IX-BA-Verdes, al traviés del so voceru, Jesús Iglesias, solicitó accesu al espediente y se-y refugó pel Conseyeru Mediu Ambiente, Ordenación del Territoriu ya Infraestructures, Francisco González Buendía, alegando que ye competencia estatal. "Los Verdes nun tenemos nesti intre diputaos en Madrid, nun sabemos pa qué sirven los del PP", dixo.

   Asina, el voceru Los Verdes señaló que si los 'populares' sopelexen tan grave l'asuntu El Musel, disponen d'abondosos senadores y diputaos pa controlar al Gobiernu," escelentemente pagaos amás y dotaos d'asistentes y asesores".

DE CHANCIA

   A lo cabero, Ignacio González, señaló que la UE abrió una investigación d'oficiu sobre l'axudicación d'entamu del contratu por mor de la esistencia d'esi abondu sobrecoste. "Agora ta en cuestión una sanción al Reinu d'España o que s'exixa la devolución de los 250 millones d'euros de sovención del entamu", dixo.

   "El Gobiernu España nun  ficiere'l ridículu d'aceutar les alegaciones de Los Verdes d'Asturies al Plan Operativu de los Fondos de Cohesión, onde dicíamos que nun presentaren el sobrecoste pa la so financiación, yá que la UE nun financia sobrecostes, nin que lo amazcararen como una segunda fase, porque d'esi mou camudaben el proyeutu d'entamu, yá aprobáu, y quedaba afeutada l'aprobación del entamu la sovención", despachó González.