La Xunta pola Defensa de la Llingua Asturiana, al cumplise esti añu una década dende de la llegada a la presidencia del gobiernu d’Asturies de Vicente Álvarez Areces, quixo recordar lo que foi la so política no que se refier a la llingua asturiana, de la que dixo que "nun foi nunca a pasar de les declaraciones d’intenciones retóriques y vacíes, de les visiones de la llingua museístiques y acomplexaes" nuna "triste y buxa etapa d’inoperacia política".

Carlos Pulgar, portavoz de la organizació, conseñó como nesta década "la situación xeneral del idioma foi de mal en peor, col perconocíu retrocesu nel númberu de falantes al cortase la tresmisión interxeneracional y la falta de derechos fundamentales de les persones qu’usen l’asturianu. Asistimos, inclusive, a la persecución de l’Alministración a ciudadanos qu’escueyen llibremente la llingua asturiana pa la so vida normal".

Pa la XDLLA la política arecista, nesti tiempu, nun foi nunca a pasar "de les declaraciones d’intenciones retóriques y vacíes, de les visiones de la llingua museístiques y acomplexaes. Too ello traxo como consecuencia unes actuaciones llingüístiques pa cubrir l’espediente, omitiendo les sos obligaciones y, munches veces, tomando decisiones, por acción o omisión, perxudiciales pal futuru del idioma". Asimesmo amestó que "nun se vio nenguna midida efectiva p’ameyorar la situación del asturianu nel sistema educativu nel que sigue la precariedá en tolos niveles, nos medios de comunicación, con una presencia marxinal nos medios públicos, y nos diferentes organismos de l’Alministración, qu’escaecen sistemáticamente lo necesario que ye la tresversalidá de les polítiques llingüístiques".

Pa Carlos Pulgar "l’avance producíu cola oficialización de la toponimia de dellos conceyos, exemplu de participación ciudadana y procuru técnicu, vese burlláu de contino pola falta sistemática de cumplimientu poles propies instancies del Principáu y poles entidaes vinculaes directamente a esti, como la Radiotelevisón del Principáu d’Asturies, Caxastur... ente otres".

"TRISTE Y BUXA ETAPA D'INOPERANCIA POLÍTICA DEL ARECISMU"

Finalmente dende la Xunta pola Defensa de la Llingua Asturiana afitaron que "cuando ta acabando la triste y buxa etapa d’inoperacia política del arecismu, pidimos a les persones y partíos que nel futuru tengan responsabilidaes de gobiernu n’Asturies que tornen esta situación de desigualdá xurídica de la ciudadanía declarando la oficialidá de la llingua asturiana. De la mesma manera, habían ser quien a llibrase de les polítiques culturales inútiles y megalomaniátiques, y axeitar unes polítiques llingüístiques series, realistes y eficaces que permitan al idioma ganar falantes y espacios d’usu, asegurando asina’l so futuru".