Entamen en Xixón les “Xornaes de la Música Alternativa Asturiana”
|
25 Agostu, 2009 por Pablo R. Alonso
- Inicie sesión o rexístrese pa espublizar comentarios
Meses redondes y conciertos van ser la base de les primeres “Xornaes de la Música Alternativa Asturiana”, eventu "lúdicu-cultural qu'emprincipia esti martes 25 d'agostu hasta'l domingu 29 y que va xirar alrodiu de delles escenes musicales alternatives asturianes". Entamao pol Ensame Cultural Sonastur y FNAST.NET, cuntarán coles ponencies y les actuaciones de dalgunos de los protagonistes de los estilos musicales representaos.
Hiphop, Hardcore y Rock n’asturianu van ser les escenes sonores protagonistes d’esta primer edición "na que nomes como los de Fran Carrio (Arma X), Pirri (Escuela de Odio) o Xune Elipe (Dixebra) van falar xunto a otros tan destacaos nes meses reondes participatives que va haber p’aldericar y reflexonar sobre’l surdimientu y evolución de caún d’estos estilos musicales n’Asturies".
Amás d’estes temátiques esclusivamente musicales, tamién va haber espaciu pa otra de calter sociomusical. Trátase del "omnipresente alderique na industria discográfica de la SGAE, la piratería y los Creative Commons, tres fechos que, según el puntu de vista, torguen o faciliten la llabor del músicu a la hora de rexistrar los sos drechos d’autor y distribuir les sos creaciones musicales".
Estes “Xornaes de la Música Alternativa Asturiana” cellébrense del 25 al 29 d’agostu en Xixón, con actividá nos locales L’Ayalga, Centru Social Sestaferia, Savoy Drinks & Music y La Rockpública. Amás, el día 29 d’agostu va tener llugar n’El Atalaya "una folixa popular pa pesllar los actos nos que habrá actuaciones participatives d’estremaos estilos (folk, rock, hiphop, rumba…), chigre con bébora y sardinada y un alcuentru de sellos discográficos y distribuidores alternatives".
L’eventu ta entamáu pola asociación cultural de reciente creación Ensame Cultural Sonastur y pol mediu de comunicación dixital sobre música alternativa asturiana FNAST.NET, amás de cuntar col sofitu de la Conceyalía de Cultura Tradicional y Llingua Asturiana del Conceyu de Xixón y dellos medios de comunicación y llocales asturianos relacionaos cola música.
Asturies.com ufre a los sos llectores'l programa completu d'estes xornaes nun archivu adxuntu a esta noticia (formatu word).
| Adxuntu | Tamañu |
|---|---|
 Programa Xornaes Musica Alternativa.doc | 30 KB |
Efrén d'Andrés
Comentarios
Equí dexo un más información sobre l'actu de güei que va abrir les "Xornaes de la Música Alternativa Asturiana"
El HipHop d’Asturies abre esti martes 25 les “Xornaes de la Música Alternativa Asturiana”
La escena Hiphop d’Asturies va ser la encargada d’abrir les “Xornaes de la Música Alternativa Asturiana” qu’entamen l’Ensame Cultural Sonastur y FNAST.NET. Una mesa redonda moderada por Galán baxo’l títulu “Hiphop n’Asturies: Evolución, rap social y rap convencional” na que participarán Dani Stylo, Arma X y Ruboh Unomasuno y un conciertu d’Eduakapenn, Dani Stylo y Galán van formar la xornada que va cellebrase nel llocal L’Ayalga de Xixón.
La influencia del Hiphop aportó a Asturies nos años 80, espardiéndose per dellos llugares como Avilés, les Cuenques o Xixón. Anguaño nesta tierra conviven dos corrientes dientro del rap: la de calter social, con lletres reivindicatives representada por coleutivos como “Kuenka Maphia”; y la que se podría etiquetar como “rap convencional”, aquella que los sos testos falen del barriu, de coses de la cai.
Na mesa redonda van participar un representante de cada escena. Per un llau Fran Carrio “Arma X”, miembru de Kuenka Maphia y excomponente de bandes como Stoned Atmosphere o 2 Cabrones; y pel otru Ruboh de Unomasuno, una de les formaciones asturianes más destacaes dientro del rap. Tendrá la pallabra tamién Dani Stylo, testigu direutu del surdimientu y evolución del hiphop n’Asturies. La mesa redonda va tar moderada por Galán, raperu destacáu dientro de les nueves xeneraciones HipHop d’Asturies.
A les 21.00, dempués de la mesa redonda qu’entamará a les 18.00, va tener llugar un conciertu que va axuntar a Dani Stylo, Galán representando’l soníu denomáu como “rapskapunk” y Eduakapenn, Mc xixonés y productor musical miembru del coleutivu “CTS Squadra”.
Entrada llibre
L’eventu va tener llugar nel llocal xixonés L’Ayalga (cai Decano Prendes Pando, xunto a l’Avenida Constitución), teniendo la mesa redonda una entrada llibre y el conciertu un preciu d’entrada voluntariu nel que caún paga lo que quiera.
Amás va rifase material musical de caún de los grupos que van actuar nel conciertu.
Más información:
www.myspace.com/danistylo
www.myspace.com/25armax
www.myspace.com/skobarap
www.myspace.com/eduakapenn1
www.myspace.com/unomasuno