UNA da anuncia de los sos actos pal 8 de setiembre

|

Unidá Nacionalista Asturiana al traviés del so coordinador Miguel Anxel Díez, adelantó dellos de los actos que va facer la organización nacionalista pal 8 de setiembre, nel que "va celebrar, como yá ye vezu nel nacionalismu d’izquierda n’Asturies, el Día de la Nación Asturiana, una alternativa a los actos oficiales del Día de Asturias".

El 8 de setiembre les actividaes concentraránse en L’Atalaya, nel barriu de Cimavilla (Xixón). Na zona de la Casa de Les Pieces, Unidá Nacionalista Asturiana fadrá una riestra d’actos festivos y políticos, que van tener como centru una xinta popular. Dende les 13.00 hores, indicó Miguel Anxel Díaz, UNA va entamar nesi espaciu "delles actividaes como xuegos tradicionales y música asturiana, nun actu que se va allongar na tarde del martes 8 y al qu’UNA quier convidar a xixoneses y los asturianos y asturianes".

El coordinador d'UNA rescampló que "la escoyeta de Xixón nun ye casual, yá qu'amás de ser un conceyu au UNA ta medrando abondo, obres como El Muselón o la Regasificadora, qu’afectan a Xixón de forma específica, exemplifiquen la idea d’una Asturies dependiente, subsidiaria y alienada que s’alcuentra nes antípodes del proyectu d’Asturies propuestu por UNA”. Asimesmo amestó que la organización "va aprovechar la xornada para reivindicar un modelu d’Asturies diferente, nel que l’autoafirmación solidaria, la sostenibilidá medioambiental, la llucha por la xusticia social y la defensa de la identidá asturiana seyan elementos centrales de l’axenda política".
 
Nel trescursu del Día de la Nación Asturiana, dende UNa dan anuncia tamién de que "va presentase'l primer númberu del periódicu de la organización, UNA Voz", que según el coordinador de UNA “tien de ser un preséu clave pal desendolcu del nuesu proyectu, porque cuando somos quien de llevar el nuesu mensaxe a la sociedá asturiana, la receptividá a les nueses propuestes ye perpositiva”.

Contador Estadistiques