El ministru de Fomentu diz que dar una fecha agora de la llegada del AVE a Xixón sedría "faltar al rigor"

|

El ministru de Fomentu, José Blanco, señaló ante los medios de comunicación, que la fecha del AVE a Xixón y a Uviéu quedará determinada cuando se conoza l'estudiu informativu. "Si güei dixere que la fecha yera nel 2015 o el 2016 taría faltando al rigor que llegará precisáu polos estudios informativos", amestó. Blanco confía na cooperación de toles alministraciones pa definir lo enantes posible l'estudiu informativu que permita finar el trazáu del AVE a Xixón

   Blanco fizo estes declaraciones nel actu de presentación de los nuevos trenes de FEVE y el centru de mandu d'El Berrón y apuntó que los estudios informativos se faen en función d'estudios xeotéunicos, y de la determinación del trazáu y son los que determinen el calendariu pa la execución d'una obra.

   "Nun voi dar anuncies de nenguna fecha enantes de que se faga l'estudiu porque quiero ser rigurosu", dixo Blanco y afitó que "el Gobiernu tien voluntá inequívoca pa entainar al máximu los plazos del estudiu informativu".

   Lo que si ye cierto, acordies colo que dixo'l ministru, ye que, nel añu 2012, los ciudadanos podrán viaxar n'AVE, porque'l tren qu'aportará a Uviéu y Xixón sedrá un tren AVE. "La dixebra ye que cuntará con un tramu que nun dirá por infraestructura AVE y que permitirá algamar la velocidá máxima cuando esta tea despachada", apuntó.

   "A partir del añu 2012 los asturianos viaxarán en AVE beneficiándose de la entrada en serviciu de tola infraestructura hasta La Pola-L.lena, permitiendo viaxar a Madrid en tres hores y media con un mediu de tresporte percompetitivu col tresporte per carretera", recalcó'l titular de Fomentu.

   "El trazáu cuenta con 500 kilómetros d'infraestructura de los que namái van quedar ensin despachar 40 y tan pronto tea fechu l'estudiu informativu yo mesmo voi dar anuncies de la fecha definitiva del acabamientu de la infraestructura", comprometióse Blanco.

   A les entrugues de los periodistes sobre la fecha d'esi estudiu informativu, el ministru, recordó que s'acaba d'encargar y que depende de la dificultá del trazáu. "Suel tar ente 12 y 18 meses la so igua y comprométome a entainar al máximo, y una vegada tea fináu taré en condiciones de dar una fecha más precisa del acabamientu d'esos 40 kilómetros que queden", despachó Blanco.

   "Nun ficimos una inversión multimillonaria pa parar la obra nos sos caberos 40 kilómetros, yá qu'eso sedría desastroso y yo nun toi equí pa que los desastres que se puean prevenir nun evitalos", declaró'l ministru de Fomentu, José Blanco.

   Al empar, dixo'l Ministru que les Cases Conceyos puen sofitar que l'estudiu informativu fine enantes porque puen facilitar el periodu d'esposición pública de los proyeutos y cooperar cola Alministración del Estáu pa que la información llegue llueu a los ciudadanos.

   "Espero la cooperación de toles Alministraciones llocales y autonómiques pa poder definir cuanto enantes l'estudiu informativu y poder contratar los caberos 40 kilómetros d'obra", dixo Blanco.

Contador Estadistiques