Entama'l I Festival Xixón 5.40

Dende esti miércoles 19 d'agostu y hasta'l domingu 23 va celebrase na villa asturiana'l I Festival Xixón 5.40, que va trayer una bona amuesa de la música celta de países como Escocia, Bretaña, Irlanda, Galicia, y por supuesto Asturies. Ente otros, van actuar los grupos escoceses Shooglenifty y The Real Mackenzies, amás de los asturianos Dixebra y Felpeyu y de los irlandeses Kila. Les actuaciones van repartise n'ocho escenarios, de los que dos van ser los principales, la Plaza Mayor y Poniente.

Los otros seis  escenarios van tar en Begoña, el Náuticu, Xardinos de la Reina, la Plazuela de San Miguel, y otros dos en Cimavilla, na Plaza de La Corrada y na de la Casa de los Nava.

Xunto a los conciertos mencionaos, van sumase les actuaciones de la banda de gaites "Inveraray and district Pipe Band" d'Escocia, xunto a la bretona "Bagad Pagan", dos gallegues,la Banda de Gaitas Robaleira y la Banda Gaitas Xinzo de Limia, y les asturianes Villa de Xixón y Villaviciosa.

Asimesmo tamién va haber un mercáu popular, con 50 puestos nel entornu de Cimavilla, degustaciones d'un menú irlandés, deportes autóctonos y folixa en dellos puntos de la ciudá, asina como'l IX Festival de Gaites, que va tar presente del vienres al domingu en tolos escenarios. De la mesma manera, l'últimu día va haber un gran desfile pel paséu d'El Muro, nel que van participar toles bandes y grupos del festival. Tamién el sábadu, día 22, va haber una gran actuación de toles bandes na Plaza Mayor a les 21.30 hores.

La programación completa d'esti festival puede consultase nesta páxina web.