Ecoloxistes n’Aición afita una meyora de la calidá del aire n'Asturies

Ecoloxistes n’Aición d’Asturies conseña que'l "cambéu de la estructura de xeneración eléctrica española fai meyorar la calidá del aire 'de fondu' n'Asturies de forma mui significativa". Según los ecoloxistes, una de les causes ye la disminución de la xeneración eléctrica con carbón, qu'amenorgó alredor d'un 40%.

Colos datos de 2008 del informe de Coyuntura del Ministeriu de Mediu Ambiente, que recueye la información referida a les estaciones de la Rede EMEP/VAG/CAMP que existen nel estáu, dende Ecoloxistes n’Aición "conseñamos que l'asitiada en Niembru, al llau de la playa de Torimbia nel conceyu de Llanes, si bien ye la que rexistraba mayores concentraciones de dióxidu d'azufre (SO2), estes disminuyeron de forma mui significativa, por mor d'un cambéu de la estructura de xeneración eléctrica, con una contención na demanda, una xeneración más distribuida, una mayor participación de la xeneración con fontes renovables y especialmente una disminución na xeneración con carbón, que ye la fonte más importante d'emisiones d'óxidos d'azufre".