Por mor del probe balance de captures de la recién finada temporada de pesca del salmón, la Conseyería de Mediu Ambiente "considera prioritariu disponer de mecanismos afayadizos pa meyorar la xestión de la especie y contribuyir a so recuperación nos principales ríos salmoneros asturianos", polo que va asitiar dellos contadores nos ríos Esva, Narcea, Nalón y Cares. La medida permitirá, yá a primeros de 2010, controlar la entrada de salmón d'iviernu nos ríos del país.

Según la Conseyería, el contador "ye un dispositivu que permite'l contéu de salmones. Furrula básicamente obligando a pasar los salmones, lo mesmo nel so ciclu ascendente como descendente, per un arcu a mou d'escáner, permitiendo asina conocer el númberu y talla de los exemplares".

Anguaño yá hai en funcionamientu contadores de salmones nel Eo, a l'altura de Pe de Viña o Saltadoiro (Santiso d'Abres), y nel Sella a l'altura del banzáu de la minicentral de Cañu (Cangues).