Los precios baxaron un 1,1% en xunetu n'Asturies

L'Índiz de Precios de Consumu (IPC) baxó en xunetu nel nuesu país un 1,1 por cientu respeuto al mes anterior (nueve décimes nel estáu) por mor fundamentalmente de les rebaxes, colo que la tasa interañal asítiase na comunidá autónoma nel -1,7%, tres décimes más que nel conxuntu del estáu (-1,4%).

   Acordies colo qu' informó l'Institutu Nacional d'Estadística (INE), la inflación interañal de la media estatal algamó en xunetu un nuevu mínimu históricu, col so docenu descensu siguíu. En concreto, dende 1961, añu nel que s'entama la serie histórica del IPC, enxamás s'esperimentara una tasa interañal tan negativa de xorrecimientu de los precios.

   No que cinca a Asturies, incidieron na baxada nun 1,1% del IPC en xunetu'l vistíu y el calzáu (-13,2% nel país y -11,8% nel estáu), que reflexa'l comportamientu de los precios en temporada de rebaxes.

   Tamién tuvieron repercusión negativa'l grupu de la cacía, los muebles y demás accesorios de la casa (-1,0% y -0,9% nel estáu), qu'amuesa los amenorgamientos a los que nos tien avezaos  el mes de xunetu. Tamién baxaron los precios d'alimentos y bebíes non alcohóliques (-0,5% n'Asturies y -0,2 nel estáu), lo qu'obedez a baxaes de los precios de les frutes fresques, la lleche, les pataques y los sos preparaos, principalmente. Menguaron amás los grupos d'otros (-0,4% n'Asturies y -0,3% n'España), tresporte (-0,2% y -0,1% n'España) y comunicaciones (-0,1% n'Asturies y España).

   Pela cueta, medraron los precios de bebíes alcohóliques y tabacu (4,3%, tanto n'Asturies como n'España), folgancia y cultura (0,9% n'Asturies y 0,8% nel estáu), pola variación de los precios del viax organizáu, amás d'hoteles, chigres y restaurantes (0,7% n'Asturies y España), lo que s'esplica polos incrementos n'hoteles y otros agospiamientos, dalgo qu'asocede davezu en branu.

   Tamién subieron los precios en melecina (0,3% n'Asturies y 0% n'España), Vivienda (0,2% n'Asturies y 0,3 n'España), n'enseñanza (0,1% n'Asturies y 0% n'España).

TASA INTERAÑAL

   No que cinca a la tasa interañal del IPC, --que ye del -1,7% n'Asturies y -1,4% en España--, la mayor incidencia negativa atópase nos tresportes, con unos precios que baxaron un 9,1% na Comunidá y un 9,5% nel país, por mor de la inestabilidá de los precios de carburantes y llubricantes. L'INE tamién destaca, nesti sen, el descensu de los precios del automóvil.

   Amás, baxaron los alimentos y bebíes non alcohóliques, un 3,3% n'Asturies y un 2,1% nel país, por mor de la cayida de los precios de les frutes fresques y la lleche. Igualmente, incidieron el vistíu y el calzáu (-2,3% n'Asturies y -2,1% n'España) por mor de que los descuentos nes rebaxes del branu de 2009 fueron más grandes ya importantes que nes de 2008.

   Nel nuesu país tamién tuvieron repercusión negativa en términos interañales los grupos de vivienda (-2,4%), folgancia y cultura (-1,1%), comunicaciones (1,0%) y melecina (-0,7%).

   Subieron nun añu n'Asturies les tarifes en bebíes alcohóliques y tabacu (13,2%), enseñanza (4,7%), otros (1,9%), hoteles, chigres y restaurantes (1,8%) y cacía y muebles y otros accesorios de la casa (1,7%).