Entama'l XIII Festival Intercéltico d'Occidente

Esti xueves presentóse y entamaron les actividaes del XIII Festival Intercéltico d'Occidente, que va celebrase en Tapia ente los díes 13 y 23 d'agostu. El festival foi presentáu n'Uviéu pol viceconseyeru de Promoción Cultural y Política Llingüística, Jorge Fernández León, en compañía del alcalde de Tapia, Gervasio Acevedo, y del director del Festival, Martín F. Cascudo. El grupu Tuenda y Michael McGoldrick, ente otros, van actuar nel FIDO.

Na rueda de prensa de presentación, el director del Festival, Martín F. Cascudo, refirióse a les principales novedaes qu'inclúi la programación d'esta décimo tercera edición. El Festival articúlase esti añu alredor de trés exes. El primer emprincipió ayer cola inauguración del Mercáu Medieval nel centru de Tapia. El segundu inaugúrase'l llunes y tien por nome Culturlingua. “Son unes xornaes de reflexón alredor de la fala de la zona. Pensamos qu'al tratase d'un festival cultural la nuesa llingua debía tener el so sitiu”, afitó. En Culturlingua abordaránse asuntos variaos como'l teatru, la comunicación o la  mitoloxía, siempre "col gallego-asturiano como nexu de xunión".
 
Protagonismu de la música bretona

El tercer exe del Festival ye "la programación puramente musical. Esta parte entamará'l miércoles 19 cola presencia de cinco bandes procedentes de la Bretaña francesa, Inglaterra, Galicia y Asturies. Nesta edición el festival quixo rendir homenaxe a la música bretona cola incorporación de dos bandes d'esta rexón francesa. Los grupos nocturnos que conformen el cartel d'esti añu son El Koku La Manzana (Asturies), Le Vent du Nord (Canadá), Maneg Tort (Francia), Tuenda (Asturies) y Michael McGoldrik (Reinu Uníu)". Les actuaciones van allugase na playa del Murallón.

El programa completu del FIDO puede consultase nesta páxina web.