Convocada una manifestación antitaurina en Xixón
|
14 Agostu, 2009 por Pablo R. Alonso
- Inicie sesión o rexístrese pa espublizar comentarios
L'asociación en defensa de los derechos de los animales ANADEL convoca una manifestación antitaurina en Xixón pa esti sábadu 15 d’agostu. La protesta va salir de la plazuela San Miguel a les 16:30 hores y tien como lema "Contra la tortura". Esti actu cuenta col sofitu d'organizaciones como Darréu y Fai, y coincide cola celebración nel cosu d'El Bibio de Xixón de la feria taurina de Begoña.
Dende la organización soberanista Fai sofiten esti actu y desixen "la inmediata abolición de les corríes de 'toros', la tipificación de la tauromaquia como delitu nel códigu penal y la declaración institucional y plena d'Asturies como país llibre de toa mena de tortura animal y, por descontao, llibre en tolos xacíos". Amás espresen "la nuesa vergoña énte'l caltenimientu de les 5 siluetes xigantes d'Osborne nel nuesu paisaxe: un 'monumentu' a la tortura animal y al españolismu más ranciu protexíu poles lleis del 'reinu d'España'".
Pela so parte dende la organización independentista Darréu denuncien "esti asesinatu sádicu que se produz esta selmana na Plaza’l Bibio de Xixón. Caltenemos que l’Asturies llibre pola que naguamos nun sedría llibre si dalgún ser vivu ye torturáu. Desiximos que nun vaya nin un euru más del dineru públicu pa les corríes de toros, yá qu’amás de dir dica un actu de tortura va destináu a un eventu que nun tien un res d’interes ente los ciudadanos asturianos". Polo que refuguen tamién "el factor aculturizador que n’Asturies tienen estos actos garráos pol españolismu más ranciu, talmente alloñáu de les costumes típiques del país".
Efrén d'Andrés
Comentarios
¿Y nun ye peor que maten xatinos a puyazos nun mataderu comarcal?. Disfruto muncho colos toros, polo menos esi animal, que vive noble, tien una oportunidá, cosa que nun tién nengún otru, nin pitu nin corderu, de defendese. OLÉ, OLÉ Y OLÉ.
Gabis
Escribir asturianu nun quier dicir que seya nacionaliegu, yo non lu soi, polo menos lo que s'entiende por nacionaliegu. Tampoco tolos antitautirnos son nacionaliegos, mesmamente, el cartelu que vi pegáu estos díes peles cais de Xixón nun taba escritu n'asturianu, y nun vi a nengún nacionaliegu posicionase nesti tema, cuando supónse que tamién habría ser un asuntu fundamental pa un nacionaliegu, paezme. No tocante a que tolos animales que van a un mataderu muerren nel intre... yo trabayé n'ún, y dígote la verdá, aquello ye bastante tremendo. Y no que toca a que ser nacionaliegu y taurín ye incompatible, habíes dir a los sanfermines a ver la pila ikurriñes qu'hai, o n'otres places, la pila de xente militante de partíos nacionaliegos vascos que va a los toros. Por ciertu, equí algún asturianiegu tamién va, has de lleer por curiosidá quien tuvo en dalguna d'eses corríes de Xixón, xente mui mui relevante que firma pola oficialidá y da la cara. La llucha antitarina y la llucha asturianiega son dos batalles diferentes. Repito, non tolos nacionalistes son antitaurinos nin tolos antitaurinos son nacionalistes, ye más, paezme que mui mui pocos, pero son dos coses diferentes, ye como facer incompatible ser asturianiegu y gustate'l boxeu, que sí que me paez una calamidá...¿y col boxéu que pasa, naide diz nada?
Gabis
Nun digas babayaes.
Naide puede escusar la TORTURA de les corrides de toros. Los animales que dices al menos muerren nel intre, y ye un preciu a pagar.
Ser nacionaliegu (si ye que lo yes) y taurín ye una incongruencia total.
Quedate col to "Olé", yo quedaréme col "Puxa".