La Comisión Europea decidió almitir a trámite la denuncia d'Izquierda Xunida y Los Verdes d'Uviéu escontra'l procedimientu d'axudicación de la construcción del nuevu Palaciu de Xusticia d'El Vascu n'Uviéu acordada pol Gobiernu d'Asturies el pasáu 25 de xunu, acordies colo qu'informó IX.
 
La Secretaría Xeneral de la Comisión Europea unvió un escritu fecháu'l 4 d'agostu onde comunica la so decisión d'aniciar una investigación pa determinar si'l citáu alcuerdo nun sigue la normativa comunitaria no que cinca a la contratación pública.

   Al empar, decidió que seya la Dirección Xeneral de Mercáu Interior de la Comisión Europea la que s'encargue de tramitar la denuncia. Tratase de la mesma Dirección Xeneral qu'anició la investigación del procesu d'axudicación de les obres del Puertu d'El Musel.

   Alejandro Suárez, coordinador d'Izquierda Xunida d'Uviéu, recordó qu'Izquierda Xunida y Los Verdes d'Uviéu formalizaron el pasáu 27 de xunetu una denuncia ante la Secretaría Xeneral de la Comisión Europea escontra l'Alcuerdu del Conseyu de Gobiernu pol que s'axudica a la empresa Xovellanos XXI la construcción d'un Palaciu "ensin mediar concursu públicu y enmazcarando dicha axudicación d'un contratu d'arrendamientu inesistente, incorporando amás un sobrepreciu sobre'l coste real de les obres de más de 110 millones d'euros".

   "Anque'l procedimientu d'investigación namái escomencipió, esta decisión de la Secretaría Xeneral de la Comisión Europea amuesa que la nuesa denuncia ta bien fecha y, si los responsables de la decisión nun la camuden, finará suponiendo una importante sanción pa les arques públiques", afitó'l políticu carbayón.

   Suárez señaló que con toa probabilidá'l pasu viniente que dará la Dirección Xeneral del Mercáu Interior sedrá la de requerir al Gobiernu d'España pa que solicite al Gobiernu d'Asturies l'espediente completu del Alcuerdu denunciáu pal so analís.

   Nel casu probable que se determine que nun se siguió la normativa europea no que cinca a contratación pública, la Comisión Europea unviará'l so informe al Tribunal de Xusticia de les Comunidaes Europees pa sancionar esta irregularidá.

DECISIÓN "ILLEGAL"

   El coordinador d'Izquierda Xunida d'Uviéu afitó qu'espera qu'"enantes de qu'esto se produza se camude una decisión que ye nidiamente illegal dende la perspeutiva del derechu comunitariu y braeramente mancadora pa los intereses de los ciudadanos y ciudadanes d'Uviéu y d'Asturies. Si nun fuere asina, alguién tendría de puxar cola responsabilidá política d'esti asuntu".

   Alejandro Suárez manifestó la so perplexidá ante lo que calificó de "rebeldía" del Conseyeru de Facienda, Jaime Rabanal, y de la "autora intelectual de la idea, la vocera del PSOE na Casa Conceyu d'Uviéu Paloma Sainz", en caltener una decisión "que non solo ye más que duldosamente llegal sinón qu'implica un sobrepreciu inaceptable, y muncho más en domines de crisis económica y probitú nel gastu, y que namái tien como finxu salvar la cara l'Alcalde d'Uviéu, Gabino de Lorenzo, tres el fracasu exaxeráu de la so operación de Los Palacios de Calatrava".

   El cabezaleru d'IX d'Uviéu recordó, amás, que'l sobrepreciu del nuevu Palaciu de Xusticia sobrepasa la llende presupuestaria decidida n'acabante pol Gobiernu.