Llamazares afita que'l Gobiernu "debe-yos a los asturianos un calendariu concretu d'obres"

|

El diputáu d'Izquierda Unida, Gaspar Llamazares, criticó que'l Gobiernu tardare siete meses en responder y enriba lo ficiera "de forma ambigua" a la so entruga sobre los plazos y les fases d'execución de la llegada del AVE a Xixón. Llamazares afitó que'l Gobiernu "debe-yos a los asturianos un calendariu concretu d'obres" y amestó que si nun lu da, ye porque "considera que va incumplilu".

   Asina lo dixo nuna rueda prensa nel recintu ferial 'Luis Adaro' tres la so visita a la Feria Internacional de Muestres d'Asturies, onde tuvo acompañáu pol coordinador xeneral d'IX n'Asturies, Jesús Iglesias.

   Ante la falta de respuesta concreta, Llamazares adelantó que volverá a facer la so entruga na Comisión de Fomentu al titular del área, José Blanco, pa que dea un calendariu d'obres como yá fizo n'otres comunidaes autónomes. "Si s'incumple, va tener d'esplicar por qué", amestó.

   Acordies col diputáu nacional, el calendariu d'obres tien de valir a les instituciones asturianes pa poder trabayar. Al empar, quexóse de que camudó'l titular del Ministeriu de Fomentu, pero non les práutiques d'esti organismu.

FINANCIACIÓN DE LA UE PA EL MUSEL.

   Llamazares tamién se refirió al sobrecoste d'El Musel, que, según él, nun tien de recayer nel Principáu sinón guetar mecanismos pa que se responsabilice la UE. Tamién alendó a investigar cuála fue la causa d'esi sobrecoste y "llimpiar, nel so casu, les posibles responsabilidaes".

   Amás, refugó que se puea considerar al diputáu rexonal asturianu, Francisco García Valledor, como "políticu pirómanu", no que cinca a la calificación fecha pol presidente del Principáu, Vicente Álvarez Areces. Pa él, ye un "políticu responsable que fai'l so trabayu nel Parllamentu asturianu".

   No que cinca a la comparanza fecha por Valledor ente'l sobrecoste d'El Musel y el 'petromochu', señaló qu'él mesmo participara na investigación d'esti caberu casu, que fue frustrao y yera "un fraude", mientres que l'incrementu del presupuestu de les obres portuaries nun lu conoz perbien, pero en tou casu tratase d'un proyeutu d'interés p'Asturies.

SOBERBIA

   A la falta feches nes obres del AVE refirióse tamién el coordinador rexonal d'IX. Iglesias criticó que l'actitú del Ministeriu del Fomentu, independientemente del color políticu que gobierne, ye siempre de "soberbia". Pa él, les obres que se tán executando o en proyeuto "lleguen tarde y lleguen mal".

   En tou casu, señaló qu'en más de 20 años se-yos quitó a los asturianos les posibilidaes de desendolcu qu'eses infraestructures lleven. "Los asturianos tamos llexítimamente marxinaos", afitó enantes d'esixir un calendariu de les obres y que se faiga dalgo p'amenorgar los plazos. Iglesias cifró en más acullá del 2015 la fecha en que llegue l'AVE a Asturies.

   "Escontra otres comunidaes, agora más dinámiques, Asturies va perder 20 años de posibilidaes de desendolcu", criticó. Mesmamente afirmó que si hai 20 años tuviere la Variante de Payares fecha y llegare l'AVE a Asturies, de xuru que'l Principáu, na negociación de la financiación, nun tuviere que demandar fondos de solidaridá.
 

Contador Estadistiques