El conseyeru de Mediu Ambiente, Ordenación del Territoriu ya Infraestructures, Francisco González Buendía, dixo güei qu'Asturies yá cuenta con un calendariu " definíu dafechu" pa la llegada del AVE. Asina refirióse a la fecha de 2012 como l'añu nel que circularán pela Variante de Payares los trenes d'alta velocidá, llegando d'esta mena a tierres del Principáu.

   Buendía fizo estes considerances, a entrugues de los periodistes, nuna rueda prensa en Xixón, onde tamién tuvo presente'l direutor xeneral de Tresportes y Asuntos Marítimos, Julián Bonet. Les declaraciones prodúcense un día dempués de que'l Secretariu d'Estáu de Planificación ya Infraestructures, Víctor Morlán, refugase ayeri dar plazos pal acabamientu del tramu que circulará per terrén asturianu, ente La Pola-L.lena y Xixón, dalgo que causó les crítiques d'estremaes formaciones polítiques.

   Buendía, sicasí, dixo que yá sabía que diba haber "polémica", pero emponderó la "potente" presentación que realizó del trazáu asturianu ayeri Morlán relativa a la decisión política del trazáu ferroviariu asturianu nel futuru, con dos variantes dafechu pa l'alta velocidá (L.lena-Soto Rei, y Llugo de Llanera-Serín).

   "Morlán fue claru y contundente", defendió Buendía, alcordándose de que'l secretariu d'Estáu comprometióse a llicitar esti añu los estudios informativos relativos a les nueves variantes. Asina reclamó "seriedá" a los que lu critiquen. "Un estudiu informativu con una declaración d'impautu ambiental sábese cuándo entama, pero non cuándo fina", apuntó.

   Esplicó que l'alcuerdu algamáu ente Principáu y Estáu pal futuru trabayu ferroviariu ye un "trabayu previu" a esos estudios informativos que se prollongaron dos años. "Esti ye un momentu históricu, porque ta too furrulando", despachó.

   Pela so parte, Julián Bonet quitó importancia al fechu de fixar un plazu pal recorríu asturianu, por mor de qu'hai dos paraes, n'Uviéu y Xixón, y l'ameyoramientu en tiempu que se pue algamar cola infraestructura asturiana finada sedrá de 15 o 20 minutos. "Lo importante daveres ye que l'AVE va entrar n'Asturies pela Variante en 2012", dixo.