El conseyeru de Trabayu, Graciano Torre, xustificó que la empresa ArcelorMittal emplegue l'ERE pautáu colos sindicatos, n'alcuerdu con estos. Nesti sen, esplicó que la previsión ye que nenguno de los dos fornos tea funcionando a plenu rindimientu, sinón a un 70 por cientu. Por esti motivu, indicó que si la plantilla ta adautada a que trabayen al cien por cien, "la consecuencia ye la que ye".

   Asina lo dixo na rueda de prensa na Feria Internacional de Muestres d'Asturies (Fidma), onde fizo un balance sobre les esportaciones asturianas y vinculó l'ERE d'Arcelor con la baxa de la demanda esterior de fierro. Tamién destacó la consolidación de les pymes nos mercaos esteriores y l'aumentu del númberu d'empreses qu'internacionalizaron los sos productos.

   Al empar, indicó que si ArcelorMittal funciona a ritmos normales y el preciu de cinc algama unos términos paecíos a otros años, xunío al ameyoramientu de la estabilidá de la empresa Suzuki gracies a les ayudes a la compra de vehículos de dos ruedas y l'afitamientu de les pymes, permitiría que'l pesu de les esportaciones asturianes algamaren el 2,2 por cientu que tien el Principáu en términos del PIB nel conxuntu d'España.

   Ye más, confió en que nel últimu trimestre del añu ameyore "un poco" la esportación. Torre destacó qu'en 2008 el volume de les esportaciones de les pymes medró un 4,7 por cientu y amestó que de 618 millones d'euros en 2001 pasóse a 1.069 millones el pasáu añu.

   Sicasí, alertó que pue haber variaciones nos próximos años, por mor de  la baxa de los precios de les materies primes, como puea ser l'aluminiu o'l cinc. Sobre esti últimu, apuntó que'l preciu de la tonelada baxó de 2.500 euros en 2007 a 986 euros en 2008, poro nun se trata d'una baxa de la producción onde se vea afectáu l'emplegu sinón la cifra del volume de les esportaciones, que se mide en cuantía d'euros.

   Torre aludió a la puesta en marcha de la empresa Asturex en 2005 col incrementu de les esportaciones. En cifres, señaló que dende 2001 medró'l volume de les esportaciones (1.577 millones d'euros) en más del doble, hasta algamar los 3.600 millones d'euros en 2007 y con un descensu'l pasáu añu hasta los 3.187 millones.

   Amás, indicó que'l crecimientu coincide con Asturex, al pasar de 2.400 millones d'euros en 2005 a 3.151 millones en 2006 y los 3.677 millones d'euros de 2.007. En cuanto a la consolidación de les pymes, de 963 en 2004 pasóse a 1.181 el pasáu añu, lo que supunxo un incrementu d'un 22,6 por cientu.

   Torre apuntó que'l Principáu concentra los sos esfuerzcios en sofitar a les pymes a esportar, ya que les ocho o diez grandes empreses asturianes qu'existen yá lo faen davezu.

   Con too, el conseyeru aseguró que se ta cumpliendo l'oxetivu marcáu d'aumentar la base esportadora asturiana y l'accesu a nuevos mercaos, ente los que citó l'incrementu de les esportaciones n'EEUU, Brasil, Venezuela, Grecia, Arabia Saudí o la República Checa.

   Al empar, señaló que'Asturies ta resistiendo "razonablemente bien" la crisis, dao los cuatro meses consecutivos de descensu del paru. Sicasí, apuntó qu'hai nicios "pero non datos" pa la recuperación de les esportaciones.