La fiscalía abre dilixencies polos vertíos al ríu Nalón dende'l Pozu Carrio

La fiscalía abrió dilixencies polos vertíos al ríu Nalón dende'l Pozu Carrio, acordies colo que informó el Bloque por Asturies nuna nota de prensa. La formación reclama darréu, ante la continuidá de los vertíos, la intervención de la Conseyería de Mediu Ambiente. BA recordó que "estos graves vertíos xeneraos nel Pozu Carrio vienen produciéndose al menos dende mediaos del mes de xunetu, constándonos que los díes 30 y 31 de xunetu, siguen produciéndose". Por esti motivu, n'opinión del Bloque, "ta xenerándose una situación continuada d'agresión pa cola calidá del agua del ríu y pa les especies que n'él viven".

   El Bloque tien previsto remitir sendos escritos a les alministraciones competentes en materia de vixilancia y observancia d'esti tipu de situaciones, ye dicir la Conseyería de Mediu ambiente y Confederación Hidrográfica del Cantábricu, pa solicita-yos la so intervención y obligar a Hunosa a paralizar darréu estos vertíos.

   Al empar, dirixiránse a Hunosa, pa informa-y d'esta situación y exixi-y que nun pue permitir que col dineru de tolos ciudadanos tea actuándose n'esti asuntu como "verdaderos atiles, arrasando cola calidá de les agües del ríu y matando les especies como denunciaba l'Asociación de Pescadores d'Amigos del Nalón, que dan por perdíos más de 30.000 alevines que se soltaran al ríu nes inmediaciones del Pozu Carrio".

   Asina mesmu, el Bloque diz que nun "se pue pasar por altu la falta de actitú de los alcaldes del Valle que convirtiéndose en cómplices por omisión d'estes actuaciones d'Hunosa, miren pa otru llau y niéguense a actuar de dalguna mena pa defender los intereses medioambientales sociales y económicos de los sos conceyos".