El secretario xeral de Política Lingüística de la Xunta de Galicia, Anxo Lorenzo, ta acabante d'asoleyar los datos de la consulta que'l nuevu gobiernu gallegu del PP fixo nos últimos meses a les families de 330.856 alumnos sobre les preferencíes d'estes no que cinca al idioma de docencia na enseñanza. La mayoría escueye una educación mayoritariamente en castellán, seguido de la opción billingüe. La participación na consulta foi del 58,7 %.

Infantil, Primaria, Secundaria y FP

Na enseñanza infantil un 53,7% de les families prefier que s'enseñe a los sos fíos a lleer y escribir "en gallegu y castellán". Un 37% namás en castellán y un 8,7 namás en gallegu.

En Primaria la opción preferida pa impartir les materies troncales ye la de “toes en castellán” con 37,6%. La segunda respuesta ye “unes en gallegu y otres en castellán” con un 26,6 %. Darréu “la mayoría en castellán” con un 17% , “toes en gallegu” un 12,5% y “la mayoría en gallegu” 5,8%. Asimesmo un 51,7% quier que los exámenes se faigan en castellán.

En Secundaria, la opción mayoritaria pa la impartición de les asignatures troncales ye “toes en castellán” con 33,8 %. De seguío asitia “unes en gallegu y otres en castellán" con 23,6 %, “toes en gallegu” un 19,8 %, “la mayoría en castellán” un 14,7% y la “mayoría en gallegu” un 7,7 %. En cuantes a los exámenes, un 44,9% quierlos en castellán, un 31,8% indistintamente y un 22,6% en gallegu.

No que cinca a los ciclos formativos (FP), un 52% escueye una educación billingüe, un 25,1% en gallegu y un 22,6% en castellán.

Valoración de los resultaos

El secretario xeral de Política Lingüística de la Xunta de Galicia, Anxo Lorenzo, darréu de dar estos datos dixo que "evidencien que la sociedá gallega se reafirma billingüe” anque conseñó que “la llingua propia de Galicia nun se valora lo suficiente” polo que reclamó “autocrítica” sobre les polítiques llingüístiques de los últimos 25 años. Asimesmo afitó que la Xunta de Galicia va desendolcar “medies positives pal idioma”.