El PP calcula que la "deuda d'El Musel asciende a 590 millones d'euros"

La vocera del grupu municipal popular y presidente del PP de Xixón, Pilar Fernández Pardo, calcó que la deuda del Puertu d'El Musel, daos los escesos de coste, van ascender a 590 millones d'euros. La conceyala popular llamentó en rueda prensa la solución acordada ayeri ente'l Principáu y el Ministeriu de Fomentu, que calificó de "irresponsable" y de mentira".

   L'acuerdu establez que va ser Puertos del Estáu'l que va otorgar un préstamu de 215 millones d'euros a l'Autoridá Portuaria de Xixón.

   Tres el conceyu celebráu ayeri en Madrid ente'l Presidente del Principáu, Vicente Álvarez Areces, y el Ministeriu de Fomentu, José Blanco, Pilar Fernández Pardo entrugóse güei demientres cuántos años los asturianos "vamos tener que devolver y a qué tipu d'interés". "El que lo fai págalo", afirmó la edil popular.

   L'Autoridá Portuaria de Xixón yá pidió "hai tamién" un préstamu de 310 millones al Bancu Européu d'Inversión (BEI), pa 49 años. Fernández Pardo recordó que dempués "solicitaron otru préstamu de 65 millones a cortu plazu a delles entidaes financieres", y tamién calcó en que'l presidente de Puertos del Estáu "dixo en Galicia que'l puertu de Xixón yera'l segundu más adeudáu d'España".

   Según informó la cabezalera del PP xixonés, "tenemos 375 millones d'euros qu'hasta agora soscribiere de préstamos l'Autoridá Portuaira". De la mesma manera, insistió en qu'a esa cantidá, hai que "suma-y los 215 millones d'euros", l'últimu préstamu del Ministeriu de Fomentu, pa financiera "el famosu escesu de coste".

   En total, "Autoridá Portuaria va tener que devolver 590 millones", afirmó Fernández Pardo. El grupu municipal popular fizo un cálculu estimativu de "12,2 millones d'euros al añu que diba haber que devolver demientres 49 años", añadiéndo-y amás, "los intereses que xenera".

   Pal PP xixonés, esta deuda ye "una carga demasiao pesada y inasumible pal puertu de Xixón demientres decenes d'años".

   Pilar Fernández Pardo recordó tamién que los beneficios de l'Autoridá Portuaria nel 2008 fueron de 8,6 millones d'euros, y que'l pagu de la deuda va torgar qu'El Musel siga xenerando riqueza. "El puertu va tener qu'estrayer de los sos ingresos esta cantidá millonaria", aseguró la edil.