Ecoloxistes n'Aición axudica 21 'banderes negres' y 13 'puntos negros' a la costa asturiana

Ecoloxistes n'Aición 'premió' nel 2009 a 311 playes españoles con 'banderes negres' por una degradación ambiental alta y con grandes amenaces sobre los sos ecosistemes y socioeconomía, y a 392 llugares con 'puntos negros' por tratase d'espacios con pequeños o puntuales impactos qu'agraven la situación, según informó güei tres la presentación del so informe 'Banderas negras 2009. La crisis, una oportunidad para la costa'. Nel mesmu inclúinse 21 'banderes negres' y 13 'puntos negros' na costa asturiana.
 
Diez son los conceyos asturianos 'premiaos' con estes 'banderes negres', ente los que s'asitia, en primer y destacada posición, el de Llanes, con cinco d'estos títulos. Ente los motivos, señálense los aparcamientos nos bufones de Pría, una futura urbanización na zona de La Pereda, y les "irregularidaes" del PXOU, anuláu por pidimientu d'Andecha Astur y l'asociación AVALL, en referencia a los planes parciales de La Güertona, La Talá y La Llavandera.
 
Ente Xixón y Llanes, únicamente'l conceyu de Ribesella queda llibre de 'banderes negres'. Concediéronse dos d'elles al conceyu de Ribedeva, pola próxima construcción del complexu residencial y un campu de golf, asina como pola construcción de viviendes sin llicencia.
 
En Caravia señálense les 1.000 viviendes que contempla'l nuevu PXOU, y en Colunga coméntase, ente otres coses, la urbanización de la Playa de La Griega. En Villaviciosa denúnciense vertíos a la Ría y en Xixón l'epardimientu de Mercuriu na obra d'ampliación d'El Musel, amás del Plan Parcial de Cabueñes, pola so afeición sobre'l suelu rural.
 
Tamién se critiquen los vertíos na Ría d'Avilés, les obres de dragáu na ría del Nalón en Sotu'l Barcu, o los vertíos a la ría de Navia per parte d'Industrias Lácteas Asturianas o la papelera d'ENCE. El conceyu naviegu ye l'únicu de tol occidente incluyíu nel informe.
 
En cuanto a los denominaos puntos negros, Xixón lleva cuatro d'ellos polos proyectos de la regasificadora d'El Musel, la incineradora y tamién la supuesta destrucción del patrimoniu cultural al destruyir dellos horros.
 
Ribedeva, Parres, Colunga, Gozón, Carreño, Avilés, Cuideiru y Tapia repártensen les otres 'distinciones' hasta algamar los 13 puntos negros concedíos.
 
Ver informe