El Principáu va apoyar a Xega n'asistencia xurídica pa les muyeres víctimes d'agresiones lesbofóbiques y transfóbiques

El Gobiernu del Principáu d'Asturies, al traviés del Institutu Asturianu de la Muyer, va apoyar económicamente a Xente Gai Astur (Xega) n'asistencia xurídica a les muyeres víctimes d'agresiones lligaes a la lesbofobia y transfobia.

   Asina acordóse nun alcuentru ente la directora del Institutu Asturianu de la Muyer, María Fernández Campomanes, y representantes de l'asociación, colos que se comprometió a entamar "una vía de collaboración pa reforzar el serviciu d'asistencia xurídica a disposición de les muyeres víctimes d'agresiones por lesbofobia y transfobia".

   Demientres el conceyu, Campomanes mostró'l so refugu a l'agresión sufrida a primeros d'esti mes por una transexual nun ximnasiu en Xixón. Sumóse asina a les palabres de condena treslladaes hai díes dende la Dirección Xeneral contra la Discriminación del Ministeriu d'Igualdá, la Conseyería de Vivienda y Bienestar Social del Gobiernu del Principáu d'Asturies y l'Ayuntamientu de Xixón.

   "La intolerancia a la orientación sexual y d'identidá de xéneru constitúi un doble factor de discriminación cuando la persona agredida ye una muyer", dixo la directora del Institutu.

   Amás, indicó que "pa contribuyir al respetu a la diversidá sexual, ye importante trabayar esta materia dende'l puntu de vista educativu, dende la escuela, pero les instituciones públiques tamién debemos orientar los nuesos esfuerzos en garantizar la información a les víctimes, pa que puean facer efectivos los sos derechos".