La Conseyería de Mediu Rural del Gobiernu asturianu nun tien previstu entamar nenguna midida pa llendar la espansión de les plantaciones d'ocalitu, asemeyada a l'aprobada pol Ayuntamientu d'Illas, xestionáu igual que la cartera autonómica por IU-BA-Verdes. La Coordinadora Ecoloxista pela so parte exixe que se reduza l'actual superficie ocupada por esta especie, mientres que los madereros piden que se consulte colos propietarios de finques la posibilidá de permitir nueves plantaciones.

   El Conceyu d'Illas incluyó nel so Plan Xeneral una ordenanza municipal que prohibía la espansión de la superficie d'ocalitu más allá de la superficie yá existente nel conceyu, y declaraba a esti árbol especie non grata. Fontes de la conseyería confirmaron a Europa Press que'l director xeneral de Montes, Joaquín Arce, nun prevé nenguna midida asemeyada, y remitióse al vixente Plan Forestal, que yá establez llendes pal cultivu d'esta panta na comunidá autónoma.

   Sin embargu, también en declaraciones a Europa Press, Fructuoso Pontigo, voceru de la Coordinadora Ecoloxista, señaló que'l documentu referíu pola Conseyería establez un máximu de 55.000 hectárees y, pese a que l'últimu inventariu forestal d'Asturies estima una superficie de 63.000, la organización calcula que nestos momentos el suelu ocupáu pola planta australiana algama les 80.000.

   Por esti motivu, el colectivu considera que'l plan nun se cumple y que debíen tomase midíes, non pa llendar les plantaciones, sinón pa reduciles. "Si nuna zona se permite plantar 1.000 hectárees, n'otra hai que cortar 2.000", señaló Pontigo.

   L'ecoloxista denunció que "se sigue semando tolos díes sistemáticamente" y negó qu'existan midíes de control efectives pa evitalo.

NUEVES PLANTACIONES

  Dende una óptica mui diferente, l'Asociación de Maderereos d'Asturies, Asmadera, tamién critica al Gobiernu asturianu porque "yá existe una prohibición de facto del ocalitu", nuna "norma interna de la Conseyería de Mediu Rural". Según esplicó'l presidente del colectivu, Luis Enrique García, nesti momentu sólo se permiten plantaciones d'ocalitos en zones nes que yá existe presencia d'esta especie nel so entornu, lo cual impide que munchos propietarios que nun tán nesta situación puen rentabilizar los sos inmuebles.

   Por esti motivu, consideró que'l Gobiernu autonómicu debe contar col puntu de vista de los dueños de terrenos afectaos, porque "los propietarios tienen derechu a rentabilizar los sos terrenos". Dende'l so puntu de vista, debía estudiase la posibilidá de permitir tamién la plantación d'ocalitos nes árees mencionaes. Sicasí, reconoció que l'actual superficie d'ocalital qu'existe n'Asturies ye bastante pa les necesidaes d'esta industria.

   El presidente d'Asmadera apuesta por buscar un consensu ente Gobiernu, empreses y propietarios que fixe "les zones más apropiaes" pa cada especie, siendo les d'ocalitu na franxa costera y hasta 400 metros d'altor sobre'l nivel de la mar.

   García defendió la importancia d'esti árbol nel sector, que cuenta con unes 150 empreses y 2.000 trabayadores. Calculó que dos tercios del mesmu, "ente 1.000 y 1.500 emplegaos" viven directamente "d'esta especie arbórea", amás de los 400 de la factoría de la papelera d'Ence, en Navia. Añalmente, les empreses madereres corten ente 600.000 y 700.000 metros cúbicos de madera d'ocalitu, que principalmente destínase a la industria del papel. El so principal destín ye la planta naviega, pero la producción asturiana tamién s'esporta a otres empreses asemeyaes de Zaragoza, Cantabria (Torrelavega) y Guipúzcoa (Hernani).

   Por esti moitvu, García criticó la midida tomada n'Illas y dexó claro que'l sector "opónse dafechu a cualquier decisión qu'implique prohibición, porque amás les polítiques d'esti tipu siempre acaben dando'l resultáu opuestu al esperáu".

   Al so xuiciu, "muncho más grave que'l del ocalitu" son los trés principales problemes d'esta industria: la falta d'ordenación de finques, la falta d'infraestructures d'accesu a los montes y la deforestación, puesto que recordó que más de 200.000 hectáreees n'Asturies nun tienen árboles.

   Dende la Coordinadora Ecoloxista, Pontigo refugó estos argumentos. "El sector madereru representa ente'l 2% y el 3% del PIB agrariu n'Asturies, ye una actividá testimonial", señaló, comparándolo coles 400.000 hectárees de masa forestal coles que cuenta la comunidá.

   Al so xuiciu, el sector nun debía llendase a la pasta d'ocalitu, y tenía qu'apostar por "especies con valor añadíu", ye dicir, que conlleven un procesu de tresformación. Recordó tamién que'l principal destín del ocalitu, la pasta de papel, ye una actividá qu'atraviesa "dificultaes económiques", y qu'otros usos, como los de postiar nes  mines, "yá tán desapaeciendo".

   "Tenemos viesques con muncha calidá de madera, y sin embargu importamos especies de fuera", criticó, amás de recordar que la superficie boscosa nun sólo produz madera sinón tamién otres actividaes, exemplificando cola castaña, cultivu que tamién s'importa nesti momentu.