Un total de 19 oses pardes criaron 27 esbardos nel Cordal Cantábricu nel 2008

n total de 19 oses pardes identificaes llogró sacar alantre a 37 críes nel Cordal Cantábricu demientres 2008, d'acordies colos datos del censu d'oses con cría que realicen los gobiernos autonómicos d'Asturies, Cantabria y Castiella y Lleón, conxuntamente cola Fundación Osu Pardu. Per zones, les poblaciones occidentales tán nuna situación de reproducción más favorable que les orientales.

   Los datos del censu, presentáu en Valladolid, reflexen una tendencia al alza nel númberu de reproducciones d'estos exemplares dende mediaos de los noventa, cuando esta especie taba nun momentu "críticu", según afirmó'l director xeneral de Mediu Natural de la Xunta de Castiella y Lleón, José Ángel Arranz.

   Sin embargu, Arranz reconoció que la zona oriental del cordal onde se realiza'l censu, ente les provincies de Palencia y la Comunidá cántabra, presenta unos númberos "más preocupantes", debío en gran parte a los peores datos de población d'osos colos que partieron nel siguimientu d'esta especie.

   En concreto, les zones analizaes son la denominada 'occidental', que s'asitia nes llendes d'Asturies, Lleón y Llugo, y la 'oriental', ente Cantabria y Palencia.

   Nel 2008 confirmóse la cría de 32 esbardos per parte de 17 oses na zona occidental, mientres que na oriental sólo dos oses llograron sacar alantre a un total de trés críes. Poro, el representante de la Xunta mostróse "preocupáu" cola situación de la franxa oriental, anque afirmó qu'en llinies xenerales el resultáu convida a un "moderáu optimismu".

   El promediu de críes por fema nel occidente del cordal pasó, según datos del censu, de 1,8 nel periodu 1989-2004, a dos ente'l 2005 y el 2008, mientres que na rexón oriental desplazóse d'ente 1,5 y 1,6 a 1,73 críes por fema, polo que los organizadores del censu afirmaron que'l trabayu de collaboración ente los gobiernos autonómicos y la Fundación Osu Pardu ta "dando los sos frutos".

COLLABORACIÓN ENTE AUTONOMÍES

   Al actu de presentación del censu acudieron, xunto a José Ángel Arranz, el xefe del Serviciu de Vida Silvestre del Principáu d'Asturies, Juan Carlos del Campo; la directora xeneral de Biodiversidá del Gobiernu de Cantabria, María Eugenia Calvo; y el presidente de la Fundación Osu Pardu, Guillermo Palomero.

   Esta presentación conxunta realizóse la primer vez n'Asturies nel 2008 y el próximu añu tendrá llugar en Cantabria, anque la collaboración ente estes alministraciones desarróllase dende 1989.

   A pesar de que los datos ofrecíos muestren un llixeru descensu nel númberu de reproducciones na zona occidental, los representantes de les comunidaes autónomes y de la Fundación coincidieron en qu'esto pue debese a factores contestuales, como l'alimentación na seronda y amás pue haber nacimientos que tovía nun se contabilizaren, polo que les cifres "nun son preocupantes", dao que lo qu'importa ye "la tendencia al alza", nel númberu de nacimientos.

   De la mesma manera, destacóse que la sociedá d'estes zones montañoses concenciáronse de la importancia del osu pardu, polo que yá nun se los persigue como enantes, anque se reconoció que tovía existen llazos d'aceru nes viesques cantábriques. Sicasí, la so colocación débese más a la presencia de xabalinos que dañen los cultivos qu'a los osos.