La dirección de Vesuvius abandonó la so propuesta de zarru de la factoría y agora plantega a los sindicatos la reducción de parte de la so plantiya. Asina-y lo manifestó nun conceyu calteníu na sede del Sasec, según confirmó'l secretariu xeneral de Fiteqa-CC.OO, José Luis García Montes. Esti afirmó que los sindicatos garren con "cautela l'anunciu", anque como ye evidente valoren de manera mui positiva esta nueva propuesta que "cambia dafechu la inicial".

   Los trabayadores de Vesuvius lleven yá dos meses de protestes ante la intención inicial de la compañía de pesllar les instalaciones del polígonu de Riañu, en Llangréu. "Evidentemente valoramos esti nuevu escenariu que ye mui diferente al inicial", destacó García Montes.

   Según esplicó'l secretariu rexonal de Fiteqa-CC.OO, la empresa sigue plantegando que la baxada de producción foi del 50% dende'l 2007, polo que tienen intención de reducir plantiya. "Ellos falen d'un turnu, lo que diba suponer una ventena de persones", dixo García Montes, qu'indicó que los sindicatos proponen que seyan salíes "non traumátiques".

   "Ellos falen de despidos, nosotros d'escedentes pa que nun se dean salíes traumátiques, por eso vamos presentar una propuesta na que se recueyen baxes incentivaes y otru tipu de figures", dixo García Montes, que recordó que la planitya actual ye que 127 trabaydores, 80 d'ellos de producción.