El Gobiernu español destinó 8,5 millones a les Academies de Llingües cooficiales dende'l 2004

El Gobiernu español destinó casi 8,5 millones d'euros a les academies de les llingües cooficiales dende'l 2004, siendo las más beneficiada la institución catalana, que recibió cerca de cinco millones, casi'l 60 por cientu del total de les partíes.

   Según consta nuna respuesta que l'Executivu remitió al diputáu d'ERC nel Congresu, Joan Tardá, nos últimos seis años, l'Institut d'Estudis Catalans, l'Academia de la Llingua Vasca-Euskaltzaindia, y la Real Academia Galega repartiéronse un total de 8,42 millones d'euros.

   Hasta'l 2006 les trés Academies recibíen dineru estatal per mediu de sovenciones, pero, de magar esta fecha les instituciones catalana y vasca entamaron a algamar fondos con cargu a los Presupuestos Xenerales del Estáu, lo que-yos impedía participar nes convocatories pa les ayudes a gastos de funcionamientu y desarrollu d'actividaes.

LA GALLEGA SÓLO RECIBE SOVENCIONES

   D'esta manera, la única que siguió recibiendo sovenciones estatales foi la Real Academia Galega, que ye, con diferencia, la que menos dineru recibe del Ministeriu d'Educación, encargáu de repartir tanto les ayudes como les partíes presupuestaries nesta materia.

   En concreto, l'Institut d'Estudis Catalans algamó 4,94 millones d'euros, el 58,75 por cientu de tol dineru estatal repartíu ente les trés Academies nesti periodu. Síguelu Euskaltzaindia, que suma 2,65 millones d'euros y yá, mui de lloñe, la institución gallega, con 820.192 euros.

MÁS DE 22 MILLONES PA LA RAE

   Les instituciones vasca y catalana vieron incrementaes añalmente les partíes presupuestaries que se-yos reserven dende'l 2006, menos nel presente exerciciu, por mor de los recortes presupuestarios acordaos pol Executivu pola crisis.

   Na so respuesta a Tardà, el Gobiernu tamién detalla'l dineru que destinó nel mesmu periodu a la Real Academia Española, que recibió un total de 22,2 millones al traviés de los Presupuestos y 1,2 millones en sovenciones por gastos d'inversión.