El presidente asturianu, Vicente Álvarez Areces, conseñó que na negociación del nuevu modelu de financiación el nuesu país "llibró una gran batalla, complexa, de les más difíciles que tuvo que llibrar, y quedó nuna bona posición".

   Areces, en declaraciones a los medios tres el debate organizáu na Casa d'Asturies de Bruseles, pola Conferencia de Rexones Periférico-Marítimes, recordó que nun se trataba sólo de repartir una cantidá adicional, sinón de quedar bien asitiaos nel modelu. "Esi modelu va evolucionar a lo llargo de los años; va ser el dineru que va tener Asturies pa financiar los sos servicios públicos nel so conxuntu, nel que s'inclúi'l conxuntu de trespasos que mos dieron pa xestionar na nuesa comunidá", dixo.

   Nesti sen, destacó qu'Asturies queda na cuarta posición de financiación per cápita cola población correxida, penriba de la media, con un pesu relativu exactamente igual que'l d'enantes nel conxuntu del sistema. Dixo amás que se vio cómo'l Gobiernu asturianu "supo caltener los intereses de la Comunidá penriba de cualquier otra circunstancia".

   "Díxe-yos qu'hasta l'últimu momentu, nel conceyu del CPFF podíen producise avances y por rigor y coherencia nel propiu conceyu prodúxose un debate sobre un elementu que mos va aportar seis millones más d'euros nel sistema", dixo Areces.

   Pal presidente asturianu cualquier crítica fácil ta falta de sen, dao qu'aseguró que'l Principáu caltuvo dende hai añu y mediu una posición que dempués espeyó nel Parlamentu y que, según Areces, naide punxo en duda porque yeren los elementos clave de la negociación.

   Areces dixo amás que nel 2010 va entamar a debatise l'escenariu pal nuevu presupuestu de la UE hasta'l 2014 y ehí van entamar a posicionase les instituciones y les organizaciones como la CRPM, polo qu'Asturies tien que tar ehí, enmarcándose nestes polítiques pa que tengan en cuenta los intereses de rexones que nun tán mui desarrollaes, que tán n'ámbitos periféricos y que tán lluchando, con éxitu, p'acabar con esi carácter periféricu y pa vencer problemes que tienen munches rexones europees como l'avieyamientu, les polítiques inmigratories, la sostenibilidá de los sistemes públiques o l'Estáu de bienestar d'una Europa en crisis.