El presidente del PP d'Asturies, Ovidio Sánchez, esixó'l desmontaxe y la retirada de les torres d'alta tensión del primer trazáu de la llinia eléctrica que pasa ente Lada, en Llangréu, y Velilla del Río Carrión, en Palencia, nel tramu que pasa pel nuesu país, paralizáu pola UE por razones medioambientales, qu'amás ordenó l'esmantelamientu de les mesmes.

   En declaraciones a los medios demientres la visita al Puertu de Tarna, el cabezaleru de los populares asturianos destacó que se trata de "una instalación de más de diez años que yá nun tien sen y qu'amás ye desgraciadamente un trazáu mui poco cuidáu, qu'atraviesa numberoses crestes de montes pasando amás pel Parque de Redes".

   "Agora que definitivamente sábese que'l tendíu eléctricu nun va per esi trazáu exiximos que se quiten toles torres hasta los sos orixes. Nun hai nengún motivu pa calteneles, y creo que tol mundu ta d'acuerdu", dixo Sánchez.

   Poro, esplicó que'l PP presentó yá iniciatives nel Senáu y nel parlamentu asturianu. Nel primer casu entrúgase al ministru d'Industria, Turismu y Comerciu cuándo va tomar el Gobiernu la decisión d'ordenar el desmontaxe y la retirada de les torres.

   En cuanto a la proposición de llei presentada na Xunta Xeneral, el grupu parlamentariu del PP pide al Gobiernu que "dexe de mirar pa otru llau" y que se dirixa al Gobiernu de la nación pa requerir la retirada de les torres.