La Xunta Pola Llingua Asturiana calculó que'l Gobiernu asturianu pue tar perdiendo ente 10 y 15 millones d'euros por nun oficializar l'asturianu, en referencia a les partíes que, nel marcu de la financiación autonómica, van corresponder a les comunidaes autónomes que sí tengan una llingua propia oficializada. Así lo estimó ún de los responsables de la Xunta, Carlos Pulgar, demientres una rueda prensa pa criticar esti fechu.

   Pulgar recordó que l'Estáu va conceder partíes de financiación complementaries pa les autonomíes con llingua propia oficial, y fizo la comparanza proporcional con Galicia, única comunidá de la que se conoz el dato concretu de la cuantía por este conceutu.

   "Si Galicia recibirá 29 millones d'euros siendo 2.800.000 habitantes, Asturies podría recibir ente 10 o 15 millones", calculó de primeres Pulgar, estimando que'l criteriu principal pa repartir estos fondos seya'l de población de cada comunidá autonóma.

CRITERIOS NEGATIVOS

   Criticó tamién al Gobiernu asturianu porque renuncia a usar la llingua como criteriu, pero "recurre a otros criterios" que consideró "negativos": "avieyamientu, dispersión y dependencia". "Pidimos dineru porque somos pocos, somos vieyos y tamos malinos", comentó. Sin embargo, dende'l so puntu de vista, el criteriu de la llingua "ye tolo contrario, ye por capacidá de progresu y de futuru, cultural y industrial".

   Por esti motivu, la Xunta criticó al Gobiernu asturianu y a los sos "prexucios pa refugar millones d'euros que diben venir tolos años", y calcó na so demanda de que na próxima reforma del Estatutu d'Autonomía s'oficilice la llingua.