Bloque por Asturies pide a Areces que "nun acepte'l modelu de financiación por ser escuru, asimétricu y medieval"

|

El voceru del Bloque por Asturies, Pablo Fernández, pidió güei al Gobiernu del Principáu, qu'encabeza Vicente Álvarez Areces que "nun acepte'l modelu de financiación propuestu pola Ministra d'Economía", Elena Salgado, por consideralu "escuru, asimétricu y medieval".

   Pa Fernández, el nuevu modelu ye "escuru", porque "resulta inaceptable" que na fase final del procesu dalgunes comunidaes tengan los datos y otres "como Asturies nun tengan nengún".

   Pero amás, según esplicó Fernández en declaraciones a Europa Press ye "asimétricu porque pásase d'un modelu d'alliniamientu uniforme, propiu de la etapa preconstitucional, a otru de diferenciación asimétrica sin nengún términu mediu".

   Pal Bloque, el modelu tamién ye "medieval", porque detrás de los criterios y categoríes d'emponderamientu financieru "lo que realmente existe ye'l pesu y la presión qu'exercen determinaos territorios a mou d'influencia feudal sobre la corte madrilana".

   Poro, el Bloque considera que'l Gobiernu d'Asturies "nun debía aceptar nengún modelu que nun tuviere basáu na simetría solidaria ente los distintos territorios que componen l'estáu y la necesaria satisfaición de los derechos ciudadanos".

   De la mesma manera, el Bloque criticó la "actitú hipócrita del PP, que per un llau critica esti modelu, y per otru les sos comunidaes autónomes, Madrid y Valencia, son les grandes beneficiaes d'ello".

Contador Estadistiques