Los delegaos del Gobiernu d'Asturies y Cantabria dicen que'l tramu Unquera-Llanes de l'Autovía va tar llistu nel 2011

|

El tramu Unquera-Llanes de l'Autovía del Cantábricu va ser una "realidá" nel 2011, según confirmaron los delegaos del Gobiernu n'Asturies y Cantabria, Antonio Trevín y Agustín Ibáñez, tres caltener un conceyu na población asturiana de Llanes. Trevín aseguró que les obres avancen a bon ritmu y nesti momentu trabayen nes mesmes 180 persones y 86 máquines pa que puean cumpliese los plazos previstos pal 2011.

   Antonio Trevín destacó la complexidá de los trabayos que se tán realizando y concretamente mencionó los enllaces de L'Arquera y la Franca, pol intensu tráficu. Por mor de les obres, el delegáu asturianu anunció que dende'l próximu sábadu y hasta'l 31 d'agostu va procedese a cortar el tráficu nel cruce de L'Arquera, ente l'AS-263 y la CN-634, en sentíu Santander. Como midida de seguridá va procedese a instalar la señalización del carril d'accesu a Llanes.

   El Delegáu del Gobiernu n'Asturies salió tamién al pasu de les crítiques realizaes pola patronal del tresporte Asetra sobre la escasa subasta d'obra pública. Nesti sen, Trevín aseguró qu'ente l'añu 2000 y el 2004 el Gobiernu Central (daquella dirixíu pol PP, col Ministeriu de Fomentu al cargu de Francisco Álvarez Cascos) n'Aturies gastó n'obra pública 1.530 millones d'euros.

   En cambiu nel periodu ente'l 2004 y el 2008, yá na etapa socialista, invirtiéronse 2.926 millones d'euros. "El tresporte tien casi'l doble de la obra pública y el doble de trabayu que tenían enantes del 2004", aseguró'l Delegáu del Gobiernu asturianu.

   Pela so parte, Ibáñez destacó'l compromisu de collaboración que soscribió dambes comunidaes p'acabar les obres de l'Autovía del Cantábricu.
 

Contador Estadistiques