L'alcalde de Corvera encabeza la protesta n'Uviéu de vecinos y conceyales contra'l trazáu de l'autovía AS-III

|

L'alcalde de Corvera, Belarmino Moro, encabezó ayer la protesta d'un grupu de vecinos del conceyu, y de los conceyales de los grupos políticos del PP y d'Izquierda Xunida, pero non los del PSOE, ante la sede de la Presidencia del Gobiernu del Principáu, pa esixir el cambiu de trazáu de l'autovía AS-III, que tal y como ta diseñada, diba atravesar les parroquies de Molleda y Solís.

   La concentración acordóse nel plenu municipal de la selmana pasada, y coincidió cola celebración del Conseyu de Gobiernu del Principáu na sede de la Presidencia. Al acabar l'actu, l'alcalde y los conceyales ellí presentes entraron nel edificiu pa presentar dos escritos, ún plantegando les alternatives que se defenden tanto dende los grupos políticos como dende los sectores vecinales, y otru exixendo un conceyu al presidente del Principáu, Vicente Álvarez Areces, pa esplicar "los perxuicios" que diba causar esta infraestructura.

   Los concentraos mostraron trés pancartes nes que s'esponía la so conformidá cola construcción de la vía, pero non col trazáu. L'alcalde, del partíu llocal Unión Social y Progresista de Corvera, recalcó, en declaraciones a los medios, la so intención d'evitar que "se consolide'l grave perxuiciu pa Corvera que va crease si se constrúi esa autovía como ta diseñada". "Pidimos que mos escucharen les autoridaes correspondientes, como la Direción Xeneral de Carreteres o'l conseyeru d'Infraestructures, y prodúxose un conceyu nun añu". "Pidimos otru fai cuatro meses, y casualmente convocáronmos ayeri pal próximu día 16", esplicó'l primer edil.

   Según Moro, "los demás cargos de l'Alministración que trataron esti asuntu hasta agora fueron inoperantes", motivu pol que solicitaron güei un conceyu col presidente del Gobiernu.

   Criticó que mientres dende'l Ayuntamientu se piden conceyos, "el BOPA ta publicando resoluciones d'aprobación del trazáu, que son lo que marca los tiempos. Nun debe dase esi tratu a Corvera, cuando hai otros trazaos posibles que perxudiquen lo mínimo", señaló.

   Diches alternatives espúnxoles el voceru d'IU nel Conceyu, Enrique Bueno, que plantega "un enllace na parte alta de Molleda, y dende ehí báxase paralelamente a la carretera que va a Trubia, y conecta cola parte alta de los Campos, dando salida realmente a los que sufren los atascos, que ye la población". Esplicó que'l trazáu actual "nun soluciona'l grave problema circulación, con 17.400 vehículos diarios dende Los Campos hasta Les Vegues, que colapsen la zona n'hores puntes", amás de que dobla l'autovía en Molleda y atraviesa L'Escañoriu, "espaciu natural protexíu, aprobáu pola Cuota". Nun tienen nengún sen", señaló, pa'delantar que si la "imponen", va plantegar un contenciosu alministrativu.

AUSENCIA DEL PSOE

   L'alcalde y el voceru del  PP, Luis Solares, criticaron l'ausencia de la concentración de los conceyales socialistes, que la selmana pasada apoyaron l'acuerdu plenariu nel que se plantegó la convocatoria. "Decepcióname'l fechu de que'l PSOE nun venga dempués de que se tomare un acuerdu plenariu nel que se dixo que sí se venía. Ye la obligación como alcalde y como conceyales, compriendo que resulte mui duro pa los ediles socialistes dir a manifestase ante los sos propios órganos de Gobiernu rexonal, pero había que ser consecuentes col acuerdu", señaló l'alcalde.

   Más duru foi'l voceru popular, qu'entiende que'l PSOE "nun quier velar polos intereses de los ciudadanos de Corvera, sinón polos del partíu que gobierna n'Asturies, y va tener que xustificalo ante los electores nel so momentu. Debió respetar l'acuerdu muncipal, nel que s'acordó tar güei equí".

Contador Estadistiques