Greenpeace conseña que la costa asturiana sufre l'acosu d'un urbanismu al "estilu mediterráneu"

Greenpeace ta acabante d'asoleyar la novena edición del informe "Destrucción a Toda Costa", correspondiente a esti 2009. Nelli afítase qu'Asturies ye, depués del País Vascu, la comunidá con menos Espacios Naturales Protexíos (ENP) de la so costa. Namás 63,6 km tienen dalguna figura de protección asturiana o europea, lo que representa un 15,6% de la costa. Según Greenpeace estos ENP "sufren anguaño l'acosu del urbanismu al más puru estilu del Mediterráneu, la construcción d'infraestructures y la contaminación".

L'informe conseña qu'en 2005 aprobóse'l Plan de Ordenación del Litoral Asturiano (POLA) que protexe los primeros 500 m de costa. Sicasí, "esti sigue ensin implementase y permite la construcción de campos de golf en la faza protexía o autoriza promociones urbanístiques". Los Conceyos son los "executores a la carta de los proyectos de los promotores, cola complicidá del Principáu d'Asturies, y promueven el urbanismo insostenible especialmente en Tapia, Navia, Cuideiru, Castrillón, Gozón, Xixón, Colunga y Llanes".

Según los ecoloxistes "un númberu importante de les nueves construcciones dirá destinada a segundes residencies, que tarán ocupaes unos tres meses al añu", polo que "nun promueven los servicios esenciales pa los vecinos que residen durante tol añu nos conceyos". Amás de les promociones inmobiliaries, l'informe conseña qu'hai proyectaos pa tol nuesu país "20 nuevos campos de golf y nuevos cais d'embarcaciones de recréu".

L'informe sobre Asturies puede consultase nesti enllaz (pdf).