IU-BA-Verdes presenta un recursu contra l'acuerdu del Conseyu de Gobiernu sobre'l palaciu d'El Vascu

|

IU-BA-Verdes d'Uviéu anunció la presentación d'un recursu de reposición contra l'acuerdu del Conseyu de Gobiernu del Principáu de 22 de xunu pol que s'autoriza la soscripción d'un conveniu cola empresa Jovellanos XXI pal arrendamientu de parte de los inmuebles asitiaos na parcela d'El Vascu (Uviéu), con destín al proyeutu de Palaciu de Xusticia d'Uviéu. La coalición considera esti acuerdu "contrariu a derechu y perxudicial pa los intereses xenerales sobre la base de los anteriores fechos y fundamentos de derechu".

   Nun comunicáu, la coalición recordó que tanto los conseyeros que representen a IU-BA-Verdes nel Conseyu de Gobiernu, Noemí Martín y Aurelio Martín, como'l voceru del grupu parlamentariu y coordinador d'IU, Jesús Iglesias, yá manifestaren la so oposición.

   P'Alejandro Suárez, coordinador d'IU d'Uviéu "el preciu y l'axudicación d'esti contratu surden d'escures y secretes negociaciones billaterales". Suárez añadió que "l'orixe d'esti contratu obedez al interés d'arreglar la situación d'una empresa privada a la que-y fallaron negociaciones entamaes voluntariamente y con ánimu de beneficiu económicu". IU-BA caltién que "l'acuerdu cola empresa nun aguanta un soplu y va carretar una sanción europea importante a España, que va acabar repercutiendo n'Asturies".

   IU caltién nel recursu que'l "arrendamientu" axudicáu directamente "nun ye un verdaderu contratu d'arrendamientu, pues nin siquier existe una edificación cierta". "Nesti momentu los inmuebles arrendaos nun existen, nun tán edificaos tovía; nun se fixa la renta de primeres del contratu, fálase de que la renta va pagase por meses pero aplázase la fixación de la cuantía de la mesma", alegó la coalición.

   L'acuerdu, según IU, "nun s'axusta a los principios de llibertá d'accesu a les subastes públiques, publicidá y tresparencia de los procedimientos".

   De la mesma manera, la coalición considera que l'acuerdu "nun persigue la eficiente utilización de los fondos públicos mediante la exixencia de la definición previa de les necesidaes a satisfacer, la salvaguarda de la llibre competencia y la selección de la ufierta económicamente más ventayosa".

   Tamién recuerda que la llei obliga nesti casu a facer por separáu l'arrendamientu y el contratu d'obres. A lo último, IU caltién que l'acuerdu "desarróllase de manera discrecional, sin proyeutu, a un preciu arbitariu y sin la correspondiente publicidá nel ámbitu européu".

Contador Estadistiques