Areces anuncia l'AVE pa 2011 con un recorríu ente Asturies y Madrid de trés hores y media

Nuna entrevista en RNE, el presidente d'Asturies faló de dellos temes d'actualidá, ente ellos sobre la crisis, de la que dixo qu'Asturies "ta resitiéndola meyor" qu'otres comunidaes, o del AVE, qu'anunció la so llegada pal 2011 con una duración del viaxe ente Asturies y Madrid de trés hores y media. Asimesmo afitó que'l nuesu país tien una "fortísima identidá que, sicasí, siéntese mui española".

Sobre la crisis, Vicente Álvarez Areces conseñó que "Asturies entra na crisis en plenu despegue. Ye una Asturies mui distinta, tenemos más de 70.000 empreses, nun tien nada que ver con aquella Asturies na que la empresa dependía de la empresa pública, sobre too del carbón de la siderurxia, Hunosa, Ensidesa... Recuperando 110.000 empleos en 10 años tábemos en plenu despegue". Añadió que "n'ochobre de 2008 emprincipiamos a notar los efectos del descensu del empléu, sicasí, nel saldu netu de 2008 fuimos la única comunidá que lu creó. Depúes vinieron unos meses malos pero agora llevamos cuatro meses siguíos creando empléu, ye dicir, con más afiliaciones a la Seguridá Social. Soportamos los efectos de la crisis pero resistimos meyor que n'otres comunidaes".

AVE

No que cinca al tren d'alta velocidá, señaló que "ta llegando a La Pola L.lena. La obra civil de la Variante de Payares va tar rematada a fines d'esti añu o nel entamu del próximu. Depués va facese la electrificación y la señalización. L'AVE entrará en La Pola L.lena nel añu 2011. A partir d'esi momentu, el trayectu de L.lena a Madrid en AVE duraría 3 hores y media, pero ye que l'AVE tien qu'entrar hasta Uviéu y Xixón. Tamos a puntu, pente una reunión que tenemos prevista col ministeriu de Fomentu, de definir la entrada nel área central asturiana, que ye mui peculiar".

IDENTIDÁ ASTURIANA FUERTE Y "MUI ESPAÑOLA"

El presidente asturianu tamién afitó nesta entrevista qu'Asturies tien "una fortísima identidá que, sicasí, siéntese mui española y que se rellaciona col mundu d'anguaño d'una manera distinta de lo que nel pasáu representaba aquella emigración que salía d'Asturies a buscase la vida porque, desgraciadamente n'aquel momentu nun teníen otra oportunidá. Güei, afortunadamente, toos ellos, dientro y fuera, siéntense orgullosos de ser asturianos y de ser españoles".