El TSXA anula'l sistema de "llibre designación" pa delles categoríes de l'alministración asturiana

El 22 de xunu'l Tribunal Superior de Xusticia d´Asturies dictó sentencia pola qu´anula l´usu del sistema de llibre designación pa los puestos de Coordinador, Asesor y Analista del Principáu d´Asturies, según informa'l Conceyu por Otra Función Pública n'Asturies. La sentencia, que resuelve un recursu entamáu por esta asociación, ye la segunda dempués de que la de 30 d´abril valtiara los nomamientos "a deu de les Xefatures de Serviciu, y supón un pasu fonderu pa finar col sistema dedócraticu de nomamientos, sofitáu  nel enfotu personal y non na estimanza obxetiva de los méritos y la capacidá de los candidatos".

Según afita la Sala de lo Contencioso-Alministrativu, el Gobiernu asturianu "nun  xustificó l´añublanza de  funciones n´estos puestos que permitan la so provisión pol sistema escepcional y estraordinariu de la llibre designación, ensin que, d´otru lláu, los Coordinadores, Asesores y Analistes desendolquen funciones de naturaleza directiva, que son les propies de los funcionarios de la confianza del poder políticu".

Pal COFPA, "n´apenes dos meses el TSXA valtió el tenderete instaláu pol Gobiernu asturianu pa consolidar y enanchar un sistema d´emplegu públicu dafechamente clientelista", añadiendo que "ye incuestionable que la responsabilidá d´esta situación correspuende, n´esclusiva, al Gobiernu del Principáu d´Asturies, que ye'l qu´algamó y executó esta política d´emplegu públicu agora arrequexada pola Xusticia.Poro, los cascotes d´esti edificiu ruinosu tienen que cayer na mollera de los sos responsables políticos y non na de los trabayadores".