Areces ve difícil qu'UPyD entre nel parlamentu asturianu

El presidente del Principáu d'Asturies, Vicente Álvarez Areces, consideró difícil qu'una cuarta fuerza política entre nel parlamentu asturianu, en rellación con Unión Progreso y Democracia, partíu que nes últimes elecciones europees sacó más de 17.000 votos n'Asturies. Demientres una entrevista concedida al programa 'Protagonistes Asturies', de Punto Radio apuntó que ve difícil qu'haya una cuarta fuerza política, porque "les xenerales o autonómiques dependen muncho de les candidatures, de les polítiques que se ficieren y del balance que faigan los ciudadanos".

   Asina, considera "prematuro" tratar esta posibilidá, porque los ciudadanos tuvieron un comportamientu "que nun ye'l que tienen normalmente nes xenerales, autonómiques y municipales". "Tolos partíos tienen derechu a desarrollar les sos alternatives, pero creo que ye mui prematuro facer conclusiones sobre si eso va ser la reproducción d'una nueva fuerza política que vaya tener presencia nel parlamentu asturianu", dixo.

   Amás, destacó que n'Asturies hai tres fuerces polítiques "yá consolidaes dende hai años". "El PSOE ye mayoritariu; el PP ye la segunda fuerza; y IU ocupa'l tercer llugar, nesti casu en coalición con Bloque por Asturies-Verdes", destacó reconociendo, sicasí, que "sin duda va haber cambios en función del contestu", anque considera "difícil" qu'haya una cuarta fuerza política.

ENTRAR NEL GOBIERNU DE ZAPATERO

   Areces analizó tamién los comentarios sobre la posibilidá de que formare parte del nuevu equipu del presidente José Luis Rodríguez Zapatero. "Si piensen asina ye que cree que pue llegar a ser ministru, que paez ser que nesti país ye una gran aspiración pa muncha xente", señaló.

   Asina, dixo que nun ye un pensamientu negativu, sinón que lu xulga como un "eloxu" a la so capacidá, anque remarcó que ta "mui a gustu" n'Asturies. "Soi presidente del Gobiernu dende hai diez años y voi completar la llexislatura", aseguró, indicando que va trabayar "dende'l primer al últimu minutu cola mesma intensidá". "Nun se me pasó pela cabeza ser ministru nesi cambiu de Gobiernu", añadió.

FINANCIACIÓN

   Per otra parte, exixó güei "más concreción" y repitió que caltién contactos permanentes con toles comunidaes autónomes en rellación cola reforma del modelu de financiación autonómica.

   Esplicó que lo qu'intenta'l Principáu ye que "dalgunos de los criterios que son comunes a los que defende Asturies, s'acentúen". "A lo último paez que va acelerase la convocatoria del Conseyu de Política Fiscal y Financiera pa caltener los plazos", añadió.

   Sicasí, dixo nun saber si va haber acuerdu. "De momentu, Asturies reconoz qu'hubo avances en dalgunes cuestiones y n'otres nun algamamos satisfaición no que demandamos", añadió'l presidente asturianu.

   "Necesitamos más concreción, necesitamos documentos pa mirar el funcionamientu del modelu nel so conxuntu y necesitamos tamién cantidaes qu'en términos absolutos y relativos respuendan a los nuesos deseos. Digo absolutos porque trátase de meyorar l'autonomía financiera d'Asturies, y digo relativos porque queremos ver tamién en qué posición queda Asturies sobre otres comunidaes na financiación", comentó.