El Gobiernu asturianu da'l preste a la proteición del entornu de los monumentos prerrománicos

El Conseyu de Gobiernu del Principáu aprobó 17 decretos de proteición patrimonial del entornu de los monumentos prerrománicos asturianos inscritos na llista del Patrimoniu Mundial de la Unesco, asina como de les cueves de la Peña de Candamu y El Pindal, tamién incluyíes hai agora un añu na llista. A lo último, llendóse l'entornu de proteición d'otres ocho cueves con arte rupestre paleolíticu.

   Tamién se dio luz verde a la primer declaración d'un Bien d'Interés Cultural de carácter industrial, según informó'l Gobiernu asturianu nuna nota prensa. La Fábrica de Lloza de San Claudio, creada en 1901, constitúi un referente dientro de la historia industrial asturiana, pola relevancia de la so producción y por dar continuidá a la tradicional producción cerámica existente nel Principáu d'Asturies.

   Cola so declaración como Bien d'Interés Cultural garantízase que cualquier actuación futura sobre les sos instalaciones s'axuste a criterios que compatibilicen el respetu a los valores patrimoniales cola necesaria y posible adautación a nuevos usos.

  Ocho de los decretos aprobaos permiten llendar l'entornu de proteición de nueve elementos asturianos inscritos na Llista del Patrimoniu Mundial de la Unesco. Trátase de les cueves de La Peña de Candamo y d'El Pindal en Ribedeva, asina como de los siguientes monumentos prerrománicos: San Xulián de los Praos (Santullanu), Cámara Santa, La Foncalada, San Miguel de Lliño, Santa María del Naranco, Santa Cristina de L.lena y San Salvador de Valdediós (El Conventín), en Villaviciosa.

   El conxuntu d'entornos de proteición agora aprobaos pa cueves que cuenten con arte paleolíticu rupestre tien en común el fechu d'afeutar, na so mayor parte, a cavidaes llocalizaes en relieves cársticos, colo qu'ello supón de necesidá de controlar l'área a la redonda de les mesmes, que tien afeición directa sobre les sos condiciones medioambientales, fundamentalmente al traviés de les infiltraciones d'agua.