Gotor defende'l "progresu en conteníos" de la llingua na Universidá y Fernández de Castro fala de "falta de llibertá"

El rector de la Universidá d'Uviéu, Vicente Gotor, defendió ayer la so política sobre la llingua asturiana na Universidá, demientres la sesión del Claustru na que se diba aldericar sobre la reforma estatutaria, votación que quedó aplazada pa dempués del branu. Esti tema foi ún de los que más tensión xeneró, cola intervención del profesor Félix Fernández de Castro, que se quexó d'una supuesta falta de llibertá pa falar sobre esti tema.

    Gotor indicó que "sigue progresándose en conteníos de la llingua asturiana", en cuanto a la presencia del idioma na Universidá. Al respeuto, Félix Fernández de Castro --que denunció supuestes amenaces por oponese a la inclusión del asturianu como llingua A nun títulu de grau, na propuesta de la facultá de Filoloxía pa la so adautación al Espaciu Européu d'Educación Superior-- apuntó na so intervención que "nun pue dicise que n'Asturies haya llibertá pa falar sobre l'Asturianu".

   Pela so parte, Vanesa García Rodríguez, representante del colectivu estudiantil, defendió, sicasí, que l'Asturianu seya una llingua propia de la Universidá. Comentó tamién que los estudiantes apostaben, coles sos enmiendes, por tener "una Universidá democrática, participativa, cultural y plural".

APLAZAMIENTU

   El claustru retrasó hasta'l próximu cursu escolar, a últimos de setiembre o primeros d'ochobre, la votación pa reformar los estatutos de la institución docente.

   Asina, tres la esposición de les enmiendes de los artículos que nun se retiraron na Comisión d'Estatutos --que se celebró ente xineru y mayu, integrada por 28 representantes del Claustru (10%)--, y realizada la votación de los mesmos ún a ún, a lo último la Mesa decidió aplazar la votación del testu pa dempués del branu. L'argumentu foi que se reduxo l'asistencia nel trescursu de la sesión, nun llegando a una mayoría bastante, y tamién pa efeutuar correiciones técniques nel documentu cola consiguiente rellaboración del testu.

   El secretariu xeneral de la Universidá, José Francisco Fernández García, esplicó tres la sesión que, de facese güei la votación y nun algamase la mayoría absoluta, el procedimientu establez que se devuelva a la Comisón qu'ellaboraría un testu de consensu y lu volvería a remitir al plenu". "Hai que llegar a un procesu de negociación con enmiendes d'un sen y otru", añadió.

   Sicasí, quiso calcar en que la votación nun yera viable al baxar la presencia del 58% al 47% de claustrales. De la mesma manera, destacó qu'en toles votaciones de los artículos con enmiendes, los votos a favor de la propuesta de la Comisión "yera siempre superior nunos 100 votos a les enmiendes".

   Tamién destacó que la Comisón aprobó por asentimientu'l 94% de les decisiones. "Creo qu'equí hai una intencionalidá de tratar de bloquiar dalgo que salió bien, dao que se consensuaron tolos estremos y garantizóse una publicidá máxima del procesu", indicó.

   Sin embargu, la catedrática de Derechu Internacional Públicu y Rellaciones Internacionales, Paz Andrés Saenz de Santamaría, destacó que la so valoración ante la decisión de la Mesa de nun someter el conxuntu de proyeutu de reforma de los Estatutos a votación de la sesión de güei, "nun pue ser más negativa".

   Andrés, que se presentó como candidata al Rectoráu nes pasaes elecciones, apuntó que'l Claustru convocóse "precisamente" pa votar la reforma. D'esta manera, entiende que la decisión del rector como presidente del Claustru d'aplazar la votación básase "seguramente en que nun tenía la seguridá de tener la mayoría absoluta que requieren los estatutos". "Paezme inaceptable dende'l puntu de vista democráticu", dixo.

   Amás, los alumnos refugaron l'aumentu del porcentaxe de representatividá de los profesores doctores, que diben pasar a tener un 55%, frente al 53% actual, tanto pal Claustru como pa les elecciones al Rectoráu. Poro, propunxeron baxar la cifra al al 51% y subir la participación d'estudiantes --del 25% al 26%--, y d'otru 1% pal personal d'Alministración y Servicios (PAS).

   Los estudiantes llamentaron que tal y como se plantegó la reforma de los Estatutos "perdióse la oportunidá de crear un modelu d'Universidá más responsable, comprometíu y participativu".