El II Alcuentru cola Música Tradicional de Xixón va axuntar nel Pueblu d'Asturies a 14 bandines del 3 al 5 de xunetu

El conceyal de Cultura Tradicional, Jesús Montes Estrada, presentó'l II Alcuentru cola Música Tradicional, dedicáu nesta edición a les bandines, y que va celebrase nel Muséu del Pueblu d'Asturies, del 3 al 5 de xunetu. Montes Estrada, en rueda prensa nel Conceyu, "destacó l'éxitu de la segunda romería de Xixón, con motivu de la festividá de San Pedro, y invitó a disfrutar d'un espaciu "francamente nuevu". L'eventu va axuntar a bandines de toa Asturies, con representación tamién d'Aragón y Lleón.

   Xunto al edil tuvieron el director del muséu de la Gaita, Alfonso Fernández, y el responsable del Archivu de Música Tradicional del Pueblu d'Asturies, Fernando Ornosa. Fernández destacó qu'esta actividá pretende crear un espaciu pa que los músicos puean intercambiar esperiencia, amás de facelo abiertu al públicu en xeneral. Tamién recordó que la primer edición dedicóse a les pandereteres.

   Les bandines, según él, son mui desconocíes. Nesti sen, esplicó que cuando nos años 80 entamóse cola recuperación de los bailes tradicionales y los instrumentos que los acompañaben, fálase sobre too de la gaita y el tambor, anque había otros como curdión, clarinete o bombu, especialmente en Navia-Eo. De la mesma manera, señaló que van actuar "agrupaciones coloristes con música variada".

   Demientres los trés díes va haber muestres d'estes bandines, dalgunes bandes con sabor más tradicional y otres con más fusión con corrientes más moces. Según él, va haber música pa tolos públicos y un programa bien estensu, con representación de toa Asturies, y de lo que se fai nel panorama de la música tradicional asturiana. Na so opinión, les orquestes llamaes "de pachanga" son les herederes de les bandines.

   Pela so parte, Ornosa destacó la presencia de bandes d'Aragón y Lleón. En total, van actuar 14 bandes, once d'Asturies. De la mesma manera, va haber chigre nel prau, aparcamientu de baldre y actuaciones per tol recintu del Pueblu d'Asturies y nel Tendayu, y hasta una que se va facer nel Muséu Etnográficu del Oriente d'Asturies en Porrúa (Llanes).

   Ente otros, destacó la banda 'Dulzaneiros del baxu Aragón', con cuatro discos editaos y una amplia trayeutoria nel panorama del 'folk', y 'Aires de Valdés', una de les más tradicionales d'Asturies. La organización ta valorando dedicar esti alcuentru'l próximu añu a la danza n'Asturies.