El preciu de la vivienda baxa n'Asturies un 1,8% nel primer trimestre del añu

El preciu de la vivienda llibre baxó n'Asturies un 1,8% nel primer trimestre del 2009, en comparanza col mesmu periodu del añu anterior. La cayida media nel conxuntu del Estáu, en tasa interañal foi del 7,65 superior a la baxada del 5,4%, llograda nel cuartu trimestre del 2008 y a la baxada del 3% esperimentada nel tercer trimestre del añu pasáu.

   Según l'Índiz de Precios de Vivienda (IPV) que publica güei l'Institutu Nacional d'Estadística (INE), el preciu de la vivienda ente xineru y marzu d'esti añu baxó nel nuesu país un 4,3%, en comparanza col trimestre anterior, el mesmu descensu que no que va d'esti añu.

   En tasa interñal, Asturies foi la cuarta comunidá con una menor cayida del preciu de la vivienda nel primer trimestre, per detrás de Melilla (-0,2), Galicia (-0,5) y Murcia (-1,6%). Les comunidaes qu'esperimentaron un mayor descensu fueron Cataluña (-13,7%), Madrid (-11,2%), País Vascu (-10,8%), Navarra (-10,1%), Aragón (-9,7%), Baleares (-8,1%) y La Rioxa (-8%).

   Con respeuto al trimestre anterior, el preciu de la vivienda subió un 0,1 por cientu, lo mesmo que la subida acumulada no que va d'añu.

VIVIENDA NUEVA Y DE SEGUNDA MANO

   A nivel estatal, el preciu de la vivienda nueva rexistró la primer vez una tasa de variación añal negativa, con un descensu del 2% nel primer trimestre, en contraste colos incrementos del 0,85% y del 3,7% qu'esperimentó nel cuartu y el tercer trimestre del 2008.

   Pela so parte, la vivienda de segunda mano aceleró'l so abaratamientu, nel primer trimestre, con una cayida de los sos precios del 12,5%, superior a los descensos del 10,7% y del 8,65 llograos nel cuartu trimestre del 2008.