El plenu de Carreño refuga la moción del PP a favor de la denominación castellanizada de dellos topónimos
|
26 Xunu, 2009 por Pablo R. Alonso
- Inicie sesión o rexístrese pa espublizar comentarios
Los votos de los conceyales del PSOE, IU, UICA, Unión Asturianista y Unidá Nacionalista Asturiana valtaron la propuesta del PP pal caltenimientu como oficiales de los topónimos castellanizaos de Guimarán, Logrezana, Pervera, Piedeloro y Prendes, agora sustituyíos por Quimarán, Llorgozana, Prevera, El Pieloro y Priendes, de manera que les cinco parroquies conserven la doble denominación. Sicasí PSOE, IU y UAS abrieron la puerta a una posible modificación si son los vecinos d'esos llugares los que la piden.
D'esti mou, la portavoz del PSOE, Áurea Gutiérrez, alvirtió qu'apoyaríen la denominación billingüe si son los propios vecinos lo que faen la pitición al plenu del Conceyu de Carreño, dalgo que tamién sofitaron IU y UAS.
Pela so parte lo mesmo UICA que la UNA refugaron la posibilidá de castellanizar esos topónimos por cuenta que ye "una minoría de los vecinos" los que piden el cambiu y amás la doble denominación facilitaría "la pérdida del topónimu n'asturianu".
Efrén d'Andrés
Comentarios
Un momentín....
Dientro d'IU nun ta BA? Y estos tán favoratibles a una posible modificación? Qué son Bloque Contra Asturies o Bloque Por Asturies?.
Y los d'UAS? Nun ta'l PAS dientro? Nun promulgaron al altu la lleva la llei del bable? Nun se supón que tán a favor de la oficialización de los topónimos? Entós? Porqué nun proponen tamién la forma trillingüe, n'inglés, por si vien dalguien de fuera?
Esto que comentes y otros casos más que se podríen añadir demuestren hasta qué puntu algama la podrén dientro de la política asturiana. Y tamién les consecuencies de remanar el fechu llingüísticu col únicu envís de llograr otru tipu d'oxetivos ayenos a él. De toles maneres, la trampa rescampla, polo menos pa los que nun se nieguen a ver lo evidente.
Una cosa qu'a mi m'engafienta muncho ye que, si llees güei tamién el diariu La Nueva Engaña ponen un artículu sobre Os Teixóis. Pero si esi topónimu nun ye oficial!!!!! Y siempre ponen Os Teixóis!!! Cuando'l correutu ye Los Teijóis. Qué te paez eso? Y con muncha toponímia del occidente pasa igual.
Mientres, nel centru, cuando en munchos pueblos tenemos oficializaos los topónimos siguen colos castellanos.
A mi suéname a tufín progalleguista machacaasturianista.
Eso del galleguismu namás existe na cabeza de cuatro, ho. Ye muncho más fácil, en Taramunde tovía nun hai nengún debate social, ye tontería sacar artículos sobre la toponimia porque nun llevaríen a nada. En Carreño vieron qu'había pa sacar unos cuantos artículos y facer sensacionalismu baratu, colo enfadaos que tán los vecinos, lo malos que son estos políticos, les xugaes de la oposición... La Nueva España namás fai eso porque supo facer un debate con ello que-y da perres, y esi debate nun tien sentíu nin en Taramundi nin nos otros 30 y pico conceyos qu'oficializanon la toponimia. A veces escaecemos qu'esta xente va a poles perres, y llamben el culu a quien faiga falta, agora tocó a un vecín de Carreño que se llevantó con pié malu.
Otra cosa que nun comenten, si tanto-yos molesta ¿ónde taben nel periodu d'alegaciones, ho? que yo sepa pa esto siempre hai un periodu d'alegaciones como pa cualquier cambiu importante a nivel municipal. Y nun será porque la prensa nun s'encargó d'avisar tamién d'aquella... que yá taba buscando per onde pinchar.
Home nun sé.
La verdá ye que yo soi de L.lena y ellí tol mundu diz los nomes de los pueblos de la so forma tradicional. Cuando escuches la forma castellana ye que nun ye d'ellí.
Lo sangrante ye que son oficiales y tovía nun s'empleguen. Paez que cuesta. Y en La Nueva Engaña nun ponen unu. Porqué nel occidente sí cuando nun son oficiales? A mi eso nun m'entra na tiesta.
Los vecinos d'esos llugares tán munchu más enfotaos n'otres coses que nun son la toponimia, pongamos por casu, LA CONTAMINACIÓN, el desmonte de L'Altu Aboño, la destrucción del so hábitat y paisaxe. ¿POR QUÉ NUN TIENEN EL MESMU TRATU HACIA ESTI VERDADERU CLAMOR POPULAR qu'a cuatro frases espetaes nel chigre d'un centru social ente non más de tres o cuatro parroquianos?, ¿porqué nun dicen esos mesmos partíos que farán casu a lo que quieren los vecinos nesti tema munchu más polémicu?
Gabis