La Fiscalía caltién que les denuncies per parte de los ayuntamientos en materia d'urbanismu son "inexistentes"

El Fiscal de Mediu Ambiente y Urbanismu, Joaquín de la Riva, manifestó ayer, na Memoria de la Fiscalía 2008, que son "casi inexistentes" los supuestos en que los conceyos remiten a la Fiscalía denuncies de fechos que pudieren ser constitutivos de delitu, a pesar de les importantes competencies que tienen en materies como l'urbanismu.

   Pel contrario, consideró "consolidáu" el cauce qu'existe, dende hai algunos años, dende l'Alministración del Principáu, d'aquellos supuestos conocíos por les instituciones que supongan delitu en toles materies referentes al mediu ambiente.

   La Fiscalía interpunxo nel añu 2008 cuatro denuncies por delitos contra la Ordenación del Territoriu. Celebróse nel 2008, nun Xulgáu de lo Penal de Xixón, un xuiciu nel que se condenó por un delitu contra la ordenación del territoriu a los qu'instalaron trés cases, de les conocíes como prefabricaes, nos llugares de La Iría-Careñes, Lliñeru-Sanmartín del Mar y L'Escañón-Tueru, toos ellos nel conceyu de Villaviciosa.

   Tamién se condenó por un delitu contra la ordenación del territoriu al que llevantó, demientres el branu del añu 2003, una vivienda unifamiliar de planta baxa, cubierta de piedra chapada, con teyáu a una agua d'uralita gris, nel llugar del antiguu camping de les parceles, en Misiegu, dientro del ámbitu de la Reserva Natural Parcial de la Ría de villaviciosa, Espaciu Natural Protexíu, careciendo de toa autorización, permisu o llicencia, pa efeutuar dicha construcción.

   D'igual manera condenóse'l pasáu añu, por un delitu de prevaricación urbanística y por un delitu contra la Ordenación del Territoriu al que foi alcalde del Conceyu de Ribesella, y a la so esposa, dao que dambos yeren corpropietarios nel mes d'ochobre del 2002, d'una finca sita nel llugar d'El Corberu, en Sardéu, Conceyu de Ribesella, na que según escritura d'estinción de comunidá del 14 de  mayu de 1998 existía "una casa de vivir señalada col númberu ún y unida a ella otra de ganáu y una cocina, que s'alcuentren n'estáu total de ruina, conservándose en pie sólo parte de les paredes esteriores".

   De la Riva, destacó tamién que'l pasáu añu 2008 executóse una sentencia condenatoria por un delitu contra la Ordenación del Territoriu, desarollando la demolición total d'una vivienda unifamiliar de dos plantes y sótanu construyida en La Iría-Careñes, nel conceyu de Villaviciosa.

   Per otru llau, nel 2008, formulóse acusación por un delitu contra la Ordenación del Territoriu, contra'l promotor y el constructor que, ente'l 23 d'ochobre del 2006 el 2 de marzu del 2007, desarrollaron la construcción d'una panera destinada a usu residencial, nuna finca sita na población de Nuviana, nel conceyu de Cuideiru, en suelu Non Urbanizable de Proteición, careciendo de toa autorización, permisu o llicencia, pa efeutuar la instalación de dicha panera.