Suatea, CSIF y CC.OO d'Enseñanza piden que se depuren responsabilidaes pol "fracasu" de la Carrera Profesional

Los sindicatos Suatea, CSIF y CC.OO de la Enseñanza pidieron que se depuren responsabilidaes pol "fiascu" de la Carrera Profesional, que s'anuló por una sentencia del Tribunal Superior de Xusticia d'Asturies (TSXA). De la mesma manera exixeron un tratu equitativu y non discriminatoriu nes condiciones llaborales de los docentes asturianos y del conxuntu de los emplegaos públicos del Principáu.

   Asina lo indicaron los sos representantes a los medios de comunicación enantes de participar nuna asamblea informativa nel institutu Alfonso II d'Uviéu, cola presencia de más d'un centenar de docentes, p'analizar el resultáu de la sentencia del TSXA qu'anula la carrera profesional.

   El presidente de CSI-CSIF d'Asturies, Lucas Álvarez, señaló que'l conceyu de güei va permitir tratar les implicaciones de la sentencia xudicial a los non firmantes del acuerdu cola Alministración sobre la Carrera Profesional.

   "La sentencia cuestiona un conceutu de pagu a cuenta, pero non el de productividá", indicó, señalando que l'Alminitración debe aprovechar esa situación pa "tomar una decisión distinta que signifique dar un tratu equitativu y non discriminatoriu a los trabayadores". Poro, reclamó "a igual trabayu igual sueldu", y aseguró que "sí hai unos responsables" de la situación actual, en referencia al "Gobiernu autonómicu".

   Pa Lucas Álvarez el Principáu, tien que buscar "una solución" con "voluntá política". "Dao que punxeron en marcha una midida illegal, tán buscando un cabeza de turcu al que dar una mocada a los emplegaos públicos, pa que mos lo dean a los sindicatos que buscábamos tresparencia y llegalidá", acabó.

   De la mesma manera, José Antonio Alonso de Suaeta remarcó que "una parte sustancial" de los emplegaos públicos d'Asturies y en concreto de los docentes "nun tuvo nengún tipu d'aumentu de sueldu nin quisieron firmar esta carrera profesional, por entender que yera perxudicial pa los sos intereses, y lleven perdíos unos 6.000 euros nos últimos dos años".

   "Tamos satisfechos de qu'haya una constatación de que vivimos nun Estáu de derechu", argumentó sobre la sentencia, apuntando que cuando'l Gobiernu autonómicu caltién que fizo les coses bien, ta "desautorizando al poder xudicial asturianu", polo que dixo que Suatea nun va siguir teniendo "paciencia", porque los tribunales-y dieron la "razón".