El parlamentu gallegu apreba la eliminación del exame obligatoriu de gallegu nes oposiciones

La reforma de la Llei de Función Pública pola que se suprime l'exame obligatoriu en gallegu de les oposiciones quedó aprobada ayer colos votos del PPdeG, mientres que los grupos que conformen la oposición --PSdeG y BNG-- mostraron el so refugu porque entienden que supón un "atentáu" contra la llingua propia gallega. La Xunta xustifica que se suprimen "barreres" y el PP que va volvese al consensu, pero la oposición avisa que sólo lo apoyen los populares

   Na sesión plenaria, los grupos de la oposicón recordaron que tanto los diputaos socialistes y los nacionalistes como los sindicatos CC.OO, UXT y CIG, que representen al 90 por cientu de los trabayadores de la función pública y que se manifestaren de manera paralela al alderique nel hemiciclu, refuguen la supresión de la prueba de gallegu nes oposiciones p'acceder a l'Alministración autonómica.

   Sicasí, la conseyera de Facienda, Marta Fernández Currás, defendió l'articuláu de la reforma, que se tramitó pol procedimientu de llectura única, porque "diba garantizar los derechos llingüísticos de los opositores", de manera que "elimina barreres" y favorez que Galicia "cuente colos meyores profesionales na Alministración".

   Per contra, pal nacionalista Bieito Lobeira, ábrese la puerta a un "desembarcu" de persones de fuera que "nun conocen la llingua y la cultura" de la comunidá gallega, lo que va dir en detrimentu de los alministraos, según auguró.

   Fernández Currás, qu'afirmó que la normativa cuenta col apoyu de los principios llegales del marzu normativu de Galicia, recalcó que "nun paez razonable prescindir d'un bon mélicu", pol fechu de que "tenga un deficiente manexu del gallegu". Con too, certificó que "nun s'ataquen los drechos de los gallego falantes", y aseguró que "les barreres nun son bones, incluyíes les idiomátiques".

   De la mesma manera, apelló a la "llibertá" de poder trabayar en cualquier ámbitu de la Unión Europea y a la "movilidá" llaboral pa xustificar la normativa. Nesti sen, aseguró que la reforma "garantiza l'usu de los dos idiomes y unos bonos servicios", tres lo qu'entendió que'l llabor de l'Alministración ye de "formación y non de selección".

ATENTÁU Y OTROS CALIFICATIVOS

   Tanto'l nacionalista Bieito Lobeira, como'l socialista José Manuel Lage Tuñas, mostráronse mui críticos cola reforma normativa que s'aprobó güei y, en pallabres del diputáu del PSdeG, la nueva lllei "ataca'l corazón de Galicia".

   Lobeira contrapunxo los "principios llegales, que defendió la conseyera, como los derechos humanos", y avisó de qu'ún d'ellos ye "poder espresase na llingua del so país". "Tolos territorios tienen una llingua propia, a menos que seyan mudos", señaló nel so turnu de réplica nuna intervención na que recibió aplausos de diputaos socialistes como María José Caride o Francisco Cerviño.

   El parlamentariu del BNG calificó de "estermín y atentáu" al gallegu la normativa aprobada y entrugóse "cuánto-yos paguen" a los diputaos del PP por defender esta normativa, a los que llamó "mercenarios del idioma".

   Tamién foi especialmente duru'l socialista Lage Tuñas, que calificó la xornada de güei como "el 18 de xunetu contra'l gallegu", y consideró que se-yos "debía cayer la cara de vergoña" con esta normativa, que "falsia la realidá". "Nun vamos participar d'esta farsa", confirmó'l nacionalista.