Xuristes pol Asturianu reitera que'l Principáu nun creó nenguna "Unidá de Traducción"

|

Xuristes pol Asturianu denuncia otra vuelta que nun ta creada la "Unidá de Traducción" anunciada'l 27 d’abril pola Conseyera de Cultura y la Directora Xeneral de Política Llingüística, yá que según-yos comunicó la Xefa del Secretariáu del Gobiernu del Principáu, “no se aprobó ningún acuerdo específico de creación de una Unidad de Traducción en la Dirección General de Política Lingüística de la Consejería de Cultura y Turismo".
 
El 27 d’abril la Conseyera de Cultura y la Directora Xeneral de Política Llingüística anunciaben la creación "per alcuerdu del Conseyu de Gobiernu de data 18 de marzu, d’una Unidá de Traducción" a la que-y “correspuende garantizar la exactitú y la equivalencia xurídica de les traducciones ente’l bable/asturianu y el castellán”. Sicasí, Xuristes pol Asturianu denuncia otra vuelta que nun ta creada tala Unidá, yá que según-yos comunicó la Xefa del Secretariáu del Gobiernu del Principáu, “no se aprobó ningún acuerdo específico de creación de una Unidad de Traducción en la Dirección General de Política Lingüística de la Consejería de Cultura y Turismo”
 
L'Aconceyamientu de Xuristes pol Asturianu conseña que tres esi anunciu per parte de la Conseyería "nun mos casaba lo que se cacarexaba colo que’l BOPA ponía, asina que, tres estudiar con procuru l’asuntu", denunciaron publicamente "que lo que s’espardía nun yera verdá; que’l Gobiernu del Principáu nun creare nengún muérganu de traducción; y que de too ello nun había más cosa real que l’alloriante pretensión de “carga-y la torna de los testos asturianu-castellán a un funcionariu al que nun se-y desixe la conocencia de la llingua asturiana pal accesu al puestu de trabayu”.

Esta primer denuncia vien confirmada, según Xuristes pol Asturianu, por una certificación de la Xefa del Secretariáu del Gobiernu del Principáu, tres requerimientu de l'AXA, na que conseña que “no se aprobó ningún acuerdo específico de creación de una Unidad de Traducción en la Dirección General de Política Lingüística de la Consejería de Cultura y Turismo”

Piden el cese de la Directora Xeneral de Política Llingüística
 
Dende l'AXA afiten que "ye la segunda vegada, en poco más de seyes meses, que l’Aconceyamientu de Xuristes pol Asturianu atrapa a la Directora Xeneral de Política Llingüística afitando públicamente lo que nun ye (la otra foi alrodiu de la resolución del Conseyu d’Europa sobre l’aplicación n’Asturies de la Carta Europea de les Llingües Rexonales o Minoritaries). Nun país onde braeramente se respete a la verdá y a les minoríes (nesti casu llingüístiques), dos de los pegollos nos que se sofita -sine qua nom- el sistema democráticu, yera de sobra pa ser cesada darréu".

Contador Estadistiques